【讀者投稿】《聖劍傳說3 Trials of Mana》遊戲感想評價 | 重製遊戲仲有咩玩法?

大家好,又係我 Snakie 何師傅。
哩個四月可以話係一個重製月份,首當其衝既有《Resident evil 3 Remake》,唔開心既野我地唔好講喇直接去第二隻重製遊戲《Final Fantasy VII Remake》,整個暢遊過程係滿足既,Tifa 的確係功不可沒。月尾就有守尾門既《聖劍傳說3 Trial of Mana》,哩隻Remake 又做唔做大家其許既 Remake 感覺出黎呢?

 

兩個都係兒時玩伴,比廠商們重製後即刻高下立見。

 

先利申,小弟係無玩過超任既《聖劍傳說3 Trial of Mana》,所以哩條影片就唔會過份地用重製哩一點去睇哩個遊戲,換言而之,小弟會用一個無玩個原作既玩家感受去講下《聖劍傳說3 Trial of Mana》既感覺,請看:

 

影片以外評論 – 重製仲有咩玩法?

始終經費同 IP (Intellectual Property) 程度不一,唔能夠同返《Final Fantasy VII Remake》黎做比較,但係好可惜兩個作品無論係發售時間,排頭,操控,連廠商都係接近/一樣,所以《聖劍傳說3 Trial of Mana》真係好容易就比下去。

 

大家都係分ARPG,大家都係控三個人,分別真係可以好大。

 

小弟亦都想討論下重製哩樣野,三隻重製既遊戲,都帶出左三個感覺出黎,我地分開切入去睇下。
《Final Fantasy VII Remake》雖然嬴左第一仗,但係亦都有一個大既隱憂就係之後既改動,劇情上而家既鋪排,令到大部份玩家對第二章既期望會提升到天花咁高,如果《Final Fantasy VII Remake》第二章最後同《Resident evil 3 Remake》既結果一樣的話,到時我諗 Tifa 都幫 SE 唔到。

 

Capcom真係估佢唔到,《Resident evil 3 Remake》其實唔係差,只係浪費左個IP‧

 

而《聖劍傳說3 Trial of Mana》既重製,小弟主觀認為其實個方向係幾好,雖然無實際玩過超任版本,但係只要將以下兩段既打王既圖片埋鏡拼拼,的確係好有懷舊既感覺,而系統上同理念上既重製,哩點《聖劍傳說3 Trial of Mana》係做到出黎,相信如果係有玩過超任既朋友會有好大感觸;同時帶出左一個重製遊戲命題出黎:點先為之一個好 Remake?

每個玩家對遊戲既要求同期待都唔一致,小弟就鍾意向難度挑戰,所以愈近代既遊戲能夠帶比小弟既刺激感真係愈黎愈少。小弟對 Remake 既期許最主要係希望有返當年相應既難度。師傅係一個重度機戰迷,超現實討論我真係想《機戰F》可以重製,特別係個難度方面可以做返當年既水準係最緊要,而唔係近年既機戰,仲衰過飛行棋,飛行棋都要擲到六先有得玩,而家既機戰直情係亂黎。

 

《機戰F》既難度真係近10年既機戰都完全追唔到,挑戰性真係好重要!

 

如果繼續用《機戰F》哩個例子去討論,我相信假設佢只係將遊戲 Remaster 我覺得大眾未必會收貨(雖然我已經好開心);又再申延哩個超現實既主題,如果佢係將小隊系統崁入去《機戰F》入面,我諗我都未必收貨,始終去返上一個問題,點先為之一個好 Remake?係無一個標準既情況下其實真係四個字,睇你點睇。
但係在我而言,我認為 Remake 需要做到一個要點就係,當新舊兩作埋鏡拼拼既時侯如果做得返個種回憶味道,我覺我已經算合格;如果係一個高分既 Remake,《Resident evil 2 Remake》就係其中一個 benchmark,既有回憶味道,又有新鮮感,可以勾起老玩家既情懷同時,亦吸引到新玩家既焦點,就係做到四個字,破舊立新。好可惜既係,四月份哩三隻既重製入面,只有阿 Jill 係做唔到,係唔合格。

 

哩d對比圖再加上成功既新遊戲性,真係無嘜野可以彈!

綜合黎講,相信 Remake 哩個系列會繼續出黎Cap水,始終係開發角度黎講理論上係會慳左成本,收益仲可以好可觀,同樣地,如果要打爛一個 Remake 系列,都可以好輕鬆。

我只係希望如果真係出《Resident evil 4 Remake》的話,真係唔好再資源重用再重用,悶呀。

多謝大家收睇,同樣地有咩問題同改善希望可以指點一下,謝謝你,再見諸位!

By Snakie002何師傅

 

Snakie002

澳洲毒撚,沉迷遊戲三十載。無實力唯有用毅力,推崇「用心打機,享受遊戲」宗旨。我得,你都得!

追蹤

Facebook 更多文章 網站