【遊戲新聞】最新玩法引起熱潮 《動物森友會》利用視角泡製遠處小鎮

正常玩《動物森友會》嘅朋友,都會美化自己個島,但多數都無諗過可以點玩海邊石灘。最近外國就 Speedi77 喺 Reddit 上發佈一張相片,利用視角令到海邊燈塔變返正常大小,呢種玩法瞬間就得到大量玩家倣效,現時已經引起熱潮。

 

Speedi77 作品

 

由於 Speedi77 嘅貼文,引發起廣大網民嘅創意,創作出各式各樣嘅「海邊小鎮」。有人喺海邊燈塔旁邊追加風車,並喺下方興建停車場;有人喺石灘旁邊起高速公路,石上追加霓虹招牌及巨型廣告牌(實際上只係一隻桌上顯示屏)。最過癮係有人將海邊變成火箭發射站,旁邊有用「和式欄柵」偽裝而成嘅房屋,望落去已經非常治癒!

 

theo1618 作品

SharkBoobies 作品

CivCorpsCouchDiv 作品

 

呢種玩法其實係利用返遊戲嘅本質,好似「燈塔」、「風車」呢類家俱,雖然比例上已經算係大件,但係同實際嘅呎吋始終有巨大嘅差距。當利用呢個視角玩法,就會令佢地睇落去變返做一件巨型設施。

 

Qua416 作品

 

每個島都會有呢種位於偏僻角落嘅石灘,要過去通常都要上上落落,而且多數都係未開發嘅地方。通過呢種玩法,令到景色變得更立體更實在,相信好快佢會變成熱門嘅地方,你又會點發揮創意去玩呢個角落?

 

五木

五木 動漫電玩宅,極愛金田一系列,擅長動作及策略遊戲

追蹤

更多文章