因為武漢肺炎全球肆虐，遊戲業界運作大受影響，日本政府宣佈國家進入緊急狀態（緊急事態宣言），東京都知事亦要求民眾「外出自粛」，令到好多公司，包括遊戲評級審查委員會 CERO 都要由 2020 年 4 月 8 日開始停工。

CERO 負責為日本家用遊戲進行年齡評級以及類型分類，假如遊戲未能獲得 CERO 嘅評級就無法上架推出，雖然目前未有明確名單講明有幾多遊戲受影響，但係評級需時，相信唔少原本計劃於年中推出嘅遊戲，都會受到影響。

日本安倍首相今日宣佈將會延長「緊急狀態」到 5 月 31 日，不過 CERO 於停工期間，亦收到唔少業界與民眾查詢，因為唔想遊戲業界生計受打擊，CERO 於 2020 年 5 月 4 日發出聲明，將於 5 月 7 日重新開始遊戲評級工作，不過就係以 Work From Home 嘅遙距形式，工作時間為 10:00 ～ 16:00，希望可以盡快令到遊戲出版部份重回軌道。

最後我地都送上祝福，希望疫情可以盡快過去！