以開發《Sherlock Holmes》系列遊戲而聞名嘅烏克蘭工作室 Frogwares 再次帶來同系列新作品《Sherlock Holmes Chapter One》，為一隻開放世界推理歷險遊戲，對應 PS4、XBox One、PC 以及即將於今年尾面世嘅兩部全新家用機，預計 2021 年正式上架。

更新：發售日已定為 2021 年 11 月 17 日。

Frogwares 以《Sherlock Holmes》系列遊戲起家，對上一隻系列作品，已經講緊係 2016 年嘅《Sherlock Holmes: The Devil’s Daughter》。今次嘅《Sherlock Holmes Chapter One》將會首次以年輕時期嘅福爾摩斯作為主角，描寫當年未正式成為偵探嘅佢，如何利用個頭腦與才華嶄露頭角。

不過，相比以往嘅作品，今集嘅福爾摩斯會較為年少氣盛，相信對玩家會產生另一種吸引力。

故事設於 19 世紀，當年 21 歲嘅福爾摩斯，得悉母親離奇死去，於是來到家族位於地中海小島嘅大宅，嘗試搵出真相。遊戲裡面，華生仲未登場，陪伴福爾摩斯進行推理嘅，係佢嘅好朋友「約翰」。

遊戲發生嘅小島，近乎與世隔絕，住民對外來人亦唔算特別友善；到底玩家可以點樣喺佢地口中獲得線索，又會隨著探索觸發幾多遊戲支線？可以自由探險嘅開放世界設定，以及靈活自由嘅推理手法，亦係遊戲最大樂趣之一。

以下為遊戲首條公佈影片：

《Sherlock Holmes Chapter One》將於 2021 年 11 月 17 日登埸，Steam 版已經開始預購，對應繁體中文字幕！