【遊戲評測】初步遊戲評測解禁 《The Last of Us Part II》無劇透系統感想

PlayStation 即將於 6 月 19 日發售嘅獨佔大作《The Last of Us Part II》(最後生還者 二部曲),早前邀請全球媒體進行正式版先行體驗,VJGamer 亦都係受邀之列。根據官方指引,評測會分為二階段,而首階段評測於日前正式解禁。由於官方對評測內容有嚴格規定,所以本文章並無劇透內容,可放心服用。

 

 

《The Last of Us Part II》(最後生還者 二部曲)由 Sony 旗下工作室 Naughty Dog 開發,屬於動作生存射擊遊戲,採用第三身視點。《The Last of Us Part》故事背景設定於被突變蟲草真菌肆虐嘅美國,呢種病菌會將人類視為宿主,並將之變為極富攻攻擊性、會食人兼夾有超強傳播力嘅感染者,面對呢種可怕嘅病毒,全球人類大幅死亡(點解咁大陣武漢肺炎味)。

今集嘅故事就發生係前作結局五年後,二位主角喬爾、艾莉結束旅程,定居於懷俄明州傑克遜市,過住安穩和平嘅生活。

可惜,好景不常。某一日,一場意外令到和平嘅生活起咗翻天覆地嘅變化。於是,艾莉為咗維護佢所堅持嘅正義並尋求終結,再次踏上殘酷嘅旅途。

 

 

由於今次係初步遊戲評測解禁 ,加上有嚴格規定,所有關鍵劇情係不能透露,所以集中於講今集系統嘅感想,至於完整嘅評測就要等待第二階段嘅解禁啦。

正式開始之前,都要講一講畫面表現,不得不讚嘅係 Naughty Dog 嘅技術又再進步。喺《The Last of Us Part II》入面,環境效果表現極之出色。前期嘅雪景,不論係地上嘅腳印、飄落嘅雪花、暴風雪等等,全部都好清晰地呈現質感;火場呈現嘅火焰亦都唔係 Hea 貼圖,做得極為立體令你感受到「熱力」。當中最常出現嘅叢林,光影表現以及潮濕環境等細節都有做出黎,完美發揮晒 PS4 嘅機能。

 

 

對比起上一集,本作可供探索嘅地方大幅增加,雖然劇情係線性式推進,但係每個區域入面,非關鍵場景 / 關鍵場景嘅比率有接近 4:1 或甚至更多(唔係開放世界)。喺呢啲非關鍵場景入面,搵資源執就一定架啦,但係比起資源,好多時會搵到各種「信件」,大多數都係苟且殘存嘅人們相互間通信。由第三方嘅描述去了解更多呢個世界所發生嘅事情,投入感更高同時添加探索嘅意慾。

 

 

同上集一樣,基本系統都係奔跑、攀爬、近戰肉搏、射擊、暗殺,當然升級武器、製造物品依然健在,同上集分別不大。另外,由於感染者對聲音異常敏感,所以本作有獨特嘅「聆聽」系統,按下 R1 之後人物會蹲下細心聆聽附近嘅聲音,畫面變成黑白,並會無視牆壁等障礙物,以透視嘅方式去顯示敵人嘅位置。

有趣嘅係,「聆聽」仲會顯示自己行走路徑所留下嘅氣味軌跡,面對攜帶犬類敵人時非常有用。

 

 

雖然動作系統大部份繼承自上集,但其實都有新增其他動作,個人認為最重要嘅就係「跳躍」。喺上集,無論間隔幾近都好,喬爾係需要搵木板之類物品作為橋樑先可以通過,其實係幾戇居。今集新增「跳躍」動作,大部份嘅場景都係跳過去就得,節奏上比起前作爽快更多。

 

「跳躍」以外,仲有爬通風管呢類適合細粒艾莉嘅動作

新動作「地上射擊」,於草叢中配搭滅聲器殺敵,神不知鬼不覺

 

近戰肉搏中,加入「閃避」動作,只要睇準時機按下 L1 就可以閃開敵人動作再加以反擊。當面對近戰型人類敵人時,對方會因應受傷程度而改變攻擊模式。例如對方滿血時,避下一就可以反擊;受傷後會變成避二下、避三下先可以反擊,其實係幾好玩。

 

「閃避」動作判定頗為寬鬆,冷靜應對就得

 

今集因為玩家同時面對多種勢力,有時都會出現感染者 + 敵對人類,又或者敵對人類A + 敵對人類B 嘅場景。喺呢啲位你想玩無雙一騎當千又得,用計等佢地鬼打鬼又得。我就試過刻意製做聲響,引感染者向我身處位置行動,再潛行至敵對人類後方協持佢,然後捉住敵人比感染者咬。

 

 

最後點都要講下,本作設有「防卡關機制」。當玩家被困於同一場景太耐,搵唔到離開方法時,系統會有提示,指引你前往關鍵場景,超級德政。另外今集雖然有騎乘、駕駛系統,但其實只佔遊戲極少部份,話要練習騎乘攻擊果啲真係噏得就噏,相信係無乜點玩過隻 Game。

 

 

《The Last of Us Part II》(最後生還者 二部曲)預計於 2020 年 6 月 19 日推出,由 PlayStation 4 獨佔,支援繁體中文字幕。

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章