武肺令到唔少世界大事紛紛延期，影響嘅上至東京奧運，下至遊戲界嘅一眾作品；不過，Sony Pictures 今日就向 Fans 派定心針，宣佈《Monster Hunter》大電影將會企硬 2020 年 9 月 4 日上映，仲公開左女主角其中一張拍攝中嘅照片：

Capcom 於 2016 年時宣佈會將全球大熱遊戲系列《Monster Hunter》改篇為荷里活電影，由《生化危機》真人電影版導演 Paul W.S. Anderson 執導，搵返佢老婆兼《生化危機》真人電影版系列女主角 Milla Jovovich，聯同《拳霸》Tony Jaa 主演（早前公佈電影海報）。

卡士聽落好盛大，不過故事就同我地理解嘅《Monster Hunter》有少少出入，一眾主角係聯合國成員，誤入世界裂縫，結果要同另一個世界嘅居民合力抵抗外星怪物，防止佢地破壞地球……。

呢張係舊相

唔知大家到底有幾期待呢套大電影，但係同當年《Biohazard》一樣，相信唔少玩家都會抱住獵奇心態入場觀賞。到底電影係咪可以如期上映，反而係我地最好奇嘅問題！同時希望電影快啲有片段公開，話唔定拍得好出色呢？