【遊戲新聞】任天堂自家開發跳繩遊戲《Jump Rope Challenge》限時免費下載到九月尾

 

任天堂於 2020 年 6 月 16 日公佈一隻全新小遊戲《Jump Rope Challenge》,顧名思義就係一隻跳繩小遊戲,即日開始免費下載至 2020 年 9 月 30 日,Switch 用家可於 e-Shop 下載;Switch Lite 用家則必須另外購買可拆式 Joy-Con 及充電裝置先可以遊玩遊戲。

根據美國任天堂官方消息,由於佢地嘅員工於 Lockdown 期間,Work From Home  超過兩個月時間,深感缺乏運動會對人體做成影響,所以自家開發左一隻以跳繩為主題嘅小遊戲,希望提醒各地玩家要定期活動身體咁話!

 

 

《Jump Rope Challenge》以 Unity 開發,可以二人同時遊玩,玩法亦非常簡單,玩家只需要雙手拎住 Joy-Con,模仿跳繩動作(必須配合雙手擺動及跳躍節省),並以每日最少跳 100 下為目標;目標數字可以隨玩家需要而調整;跳繩苦手嘅朋友,亦可以同屋企人或朋友「二人協力」去達到 100 下嘅目標。

 

 

官方並提醒玩家,深夜遊玩遊戲時,亦可以揀選「伸展模式」,即係淨係進行手部擺動,免去跳躍部份,避免嘈住樓下咁話。

遊戲已經上架,各位玩家記得下載咗先啦!

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章