【遊戲評測】戰爭機器系列新嘗試 《Gear Tactics》好玩度喜出望外

戰棋遊戲對我黎講主要分為二類,一種好似《機戰》、《G Gen》咁行格仔,另一種好似《Xcom》咁,消耗點數進行各種行動。今次《Gear of War》系列新作《Gear Tactics》就係屬於後者,而製作團隊巧妙地將《Gear of War》各種元素放入去,令《Gear Tactics》變成一隻極之豐富兼有個性嘅遊戲,好玩度令人喜出望外。

 

 

《Gear of War》系列係一款第三身射擊遊戲,曾橫掃多個獎項及極佳銷售數字。遊戲最初由 Epic Games 開發,由四代開始就改由 The Coalition 開發,不過同樣都係由 Rod Fergusson 操刀,所以一直都 Keep 到水準。至於《Gear of War》系列喺香港亦都試過有段輝煌時期(2代果陣),但係隨住 Xbox One 市場失利,導致遊戲支持度大減。根據非正式統計(即係問自己d fd),其實大部份 Gamer 都認識呢個系列,不過因為無機所以就無玩到之後嘅集數咁解。

 

《Gear of War 2》應該係最多香港人認識嘅一集

 

講返《Gear Tactics》,同樣由 The Coalition 開發,係一款回合制戰術遊戲。故事背景設定於初代《Gear of War》12 年前,人類最後嘅城市面臨「獸族大軍」攻擊,快將失守。於是玩家所扮演嘅小隊,就成為人類最後嘅希望,目標消滅獸族科學家 Ukkon,解開困局。

 

《Gear Tactics》主角其實係《Gears 5》女主角Kait 老豆 Gabe Diaz

 

遊戲故事就內容唔想劇透大家,但其實劇情鋪都算係唔錯,去到中段仲頗驚喜添,留返比大家自己體驗。遊戲中主線劇情大部份都係操控 Gabe、Sid 同 Mikayla 三位主角,並且會喺營救任務中或者招慕當中獲得唔同職業嘅角色。每位角色除咗職業之外,技能書、武器配件、防具配件、外觀、名字等都可以自訂。不過要注意一點,喺《Gear Tactics》入面角色死亡代表真係死咗,會無咗呢位角色的。又因為遊戲係無手動 Save 呢樣野,即係話角色死亡的話你只有二個選擇:由頭打過該關又或者由得佢。

 

類似機戰咁,角色擊殺敵人後會得到經驗值,但當角色等級超過敵人的話,回報會少得可憐,所以要均衡分配殺敵

支線任務需要進行 2-3次先會回歸主線,但係每位角色只可以出擊一次,如果只集中升級某幾位角色,會令支線任務變得吃力

 

類似《Xcom》類遊戲,戰鬥雙方都有命中率呢項數值,要令對方難以攻擊我方最有效嘅當然係進入「掩體」,以我方利射擊角度攻擊敵人。講就咁講,但敵人同樣會進入「掩體」,所以我方要考慮進攻角度、進攻後有無剩預行動力進入「掩體」等等,特別係呢隻遊戲並無 S/L 大法,每一步都要諗清楚先行。

 

敵人同樣有技能,敵方狙擊手用技能「鎖定」(紅色線)後,被鎖角色只要有任何動作都會觸發,會造成大量傷害

突破「掩體」可以使用手榴彈,但係 CD 時間頗長(有縮短 CD 技能、配件)

簡單行動如「移動」都要扣 AP

身處制高點會增加射擊命中率

 

走位之外,本作仲有一個極之重要嘅系統「Overwatch」。「Overwatch」簡單講就係拉出一個定位射擊區,只要有人經過就會自動射擊並強制停止對方行動(部份敵人免疫)。點樣喺我方行動回合,劃出「Overwatch」區壓制敵人,係剋制對方行動最有效嘅手段之一。但其實敵方同樣可以劃「Overwatch」區,點破突敵人限制非常考腦筋。

 

「Overwatch」並非無敵,最大弱點係計殘彈數及 AP。例如我有 3 點 AP 2發子彈,咁「Overwatch」就只會攻擊二次。

破突「Overwatch」都有唔少方法,簡單用有 CD 時間嘅反「Disabling Shot」、用職階「Vanguard」硬坦又得、用「Scout」隱身接近再用「二連射」秒殺又得

 

戰鬥系統係本作重心所在,遊戲中每位角色初始有三點行動點數,不論係移動、攻擊、上彈、開箱等等全部都要用到。但係透過配搭各種武器、防具配件,可以達成單人清場華麗技巧。例如我重點培育嘅狙擊手 Mikayla,配搭被動技能「移動後增加 50% 傷害」、「增加 30% 暴擊率」、「每次攻擊有 15% 機會回復 1 AP」,另加主動技能「命中回復 2 點 AP」、「擊殺後自動上彈及回復 1 AP」、「擊殺後 AP 回復至最大數」等等,只要走位靚,真係可以一人清晒全場,即使敵人能力與我方角色相約。

 

配件能力五花八門,淨係諗點配裝都好好玩

我方出戰角色最少二人最多四人,但敵人數量最少都有成二十人,而且雙方能力相約,非常考戰術運用(你睇畫面幾壯觀)

每個職業都有自己技能樹,當中又會有四個分支

 

戰鬥系統有心思,敵人設定都無 Hea。怕你地覺得易玩,敵人亦會有強化版獸人外加各種能力。例如手握爆炸箭嘅敵人,一箭可以射 Down 你;有幫隊友上加防 Buff 嘅敵人(加 70% 防!);有不會被擊退兼手持無視「掩體」榴彈砲敵人等等,務求你死完又死。

 

擊殺手持爆炸箭、榴彈砲敵人後,會掉落該武器供玩家撿拾

 

另外每一章最尾都會進入 Boss 戰,每場都有唔同玩法,但係共通點係小隊要分散走位,如果唔係根本無得打。好似第一場 Boss 戰,唯一弱點係背部。要攻擊背部要一邊負責引一邊負責攻擊,但係又要抽時間打爆佢雙手嘅機關炮減低威脅,同時又要面對每隔幾 Round 就出黎支援嘅獸人,真正忙到嘔。好在 Boss 戰每次打爆佢一格血就會有 Check Point,就算之後炒粉都唔洗由頭打過,算係咁。

 

 

任務種類大致分為三種,第一種係以二人出擊,拯救被困隊友嘅「營救戰」;第二種係佔據補給點並守住一段時間嘅「控制戰」;仲有一種係限時內收集最少三個箱嘅「清道夫戰」,當中又以「清道夫戰」最難玩。因為每一回合喺我軍後方都會被轟炸(中咗即 Down),所以每回合開始第一個動作就係移動。又因為移動後所剩 AP 無幾,導致能做嘅行動有限。

 

有一關挑戰任務初始只有 2Ap,太難過唔到

 

總結

《Gear Tactics》遊玩體驗帶比我嘅感受係非常愉快的。

遊戲整體表現甚佳,不論係畫質、音樂、系統、射擊感等等,而且將 FPS《Gear of War》種種元素巧妙地融入,對老玩家黎講絕對值得加分。但係遊戲仍然有缺點,例如係經驗值極少令角色成長極為困難。另外遊戲長度雖然有三十零關三隻 Boss,但係重玩性偏低,爆機後嘅關卡感覺係「為打而打」,如果設有二週目相信會較好。

《Gear Tactics》今次改玩戰略遊戲,加上遊戲背景係初代故事前,就算係從未接觸過呢個系列嘅玩家亦都無問題。另外將本作加入 Xbox Game Pass,即係話最少只需要比 HKD $10 就可以玩到(新用戶優惠),可見今次作品由製作到營銷都係經過精心計算,而且係成功的,亦希望佢會發展成為新系列。

P.S. 其實隻 Game 係有繁中,不過我覺得英文靚啲咁解

編輯部評分:8.5/10

 

《Gear Tactics》暫時只有 PC(Win 10 & Steam)版本,遲下會有埋 Xbox One 版本。

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章