【讀者投稿】《異度神劍 終極版》110小時心得攻略及四天王試範 | 日系廠商舉步維艱


大家好,又係我Snakie何師傅。

最近囉起左部Switch諗住是但搵隻RPG玩下,本身係對Xenoblade無認識,純粹知道有Xenoblade 2但係無開過黎玩,見佢新出左隻重制版仲要叫做《異度神劍 終極版》咁沙塵,帶住有色眼鏡入進行新遊戲,點知,不得了,最緊要師傅有少少眼疾所以畫面唔係一個大問題,一開始之後就個幾星期無停過,好彩都趕得切係POE開新League之前可以爆曬同埋做曬所有攻略片,以下係90小時既遊玩後感,不得不再講舊式RPG真心有Feel,亦因為無玩過原版所以感覺良好!請看:

 

 

最終總共玩左110小時終於打曬所有野可以安心封碟!大家如果有玩的話可以Click入去仲有兩條《異度神劍 終極版》既影片,包括《異度神劍 終極版》攻略技巧整合以及《異度神劍 終極版》討伐四天王攻略,希望可以幫到大家!謝謝你!

影片以外評論 – 日系廠商舉步維艱

《Xenoblade》係2010年Wii上面推出既作品,因為師傅無擁有過Wii亦無係其他平台玩過《Xenoblade》所以完全可以當係新Game去玩,其實有個好處就係,玩哩一類比較上搬字過紙型既Remaster起碼網上已經有好多攻略Wiki各樣,玩起上黎順手好多,亦都對日系遊戲廠商係現今遊戲市場有一個感覺:點解經典日系遊戲相比十年二十年前出少左咁多?

 

《Xenoblade》支線真係多到好誇張,亦都係舊代RPG先會夠膽放咁多支線入去隻Game入面。

細數當年接觸而有印象既JRPG第一隻真係FF7,接下來FF系列,Grandia,Kingdom Heart,.hack系列等等都玩過好多不同既種類同品牌,反觀近年(唔計今年)比較記憶猶新JRPG除左Persona 5同八方旅人之外真係唔係好諗到。去睇返個Game櫃先發覺原來自己都無咩買到新JRPG玩,先醒起原來自己都將哩個遊戲種類遺忘左。再睇一睇個櫃,原來好多歐美Game多左出黎, Skyrim,The Witcher 3,Uncharted系列,先知道自己都不知不覺間由一個日系仔變左做萬能插,嘜都岩。

《Uncharted》系列可以話係頭一批成功吸引到日系遊戲Fans開始接受歐美遊戲。

當期時Persona5推出既時侯除左反應極好之外,大家都對返JRPG有返信心,其後既DQ11同Xenoblade 2等等都有返相對不錯既銷量同評價,表面上的確係好似幾落觀,起碼有Game出先,實際上,整體上既玩法同流程其實係無咩突破:依舊三至四人團隊出擊,一路以線性手法交代故事劇情,中間有可以做既野都好有限,最後爆機完場,你可能會話,「咁你想點呀?RPG係咁架啦。」其實唔一定係咁,睇返市場上有Fallout,Skyrim,Divinity: Original Sin II哩一類既CRPG證明左其實真係唔一定係咁玩,而銷量亦都更加引證左哩個事實。The Witcher 3多元化到昆特牌都獨立出左隻Game出黎仲要好評,JRPG真係做唔到。

 

Skyrim利害之處係淨係玩Mod都夠你玩幾年,係真係幾年都係玩緊同一隻遊戲。

雖然師傅真係鍾意玩日系遊戲多過歐美,始終飲日本奶大,但都無可否認日系廠商的確仲沿用緊舊一代既遊戲思維創作遊戲(手游除外),絕對係一個唔健康既生態:試想下DQ11唔係叫勇者鬥惡龍,無鳥山明眼珠,係一個全新Serie的話,仲會唔會咁好賣?起碼有一定落差。亦即係意味著,JRPG而家既銷量好大程度係來自「情懷」哩個賣點,就係賣佢地就係DQ JRPG既感覺,哩個做法對DQ本身開發廠商當然好好,因為一定有銷量;但係對其他廠商如果想開一個新Serie會有好大既阻力,仲會有一個束縛,整得好既就無事(咁咩Game整得好都無事既),脫離左JRPG框架得黎但去唔到高評價的話,好易比玩家冠名上「都唔JRPG」,最終廠商們只好繼續惡性循環,炒冷飯,最多比人講炒冷飯,起碼有餐食丫,有勇氣有本錢既廠商都會選擇出續作多過開新Serie。所以只可以講,有得玩好玩喇。

 

《FF7RE》就係一個好例子,如果唔係Tifa係一條新女相信哩隻遊戲引起既漣漪都無咁強。

如果想繼續看到遊戲攻略評價,各式各樣遊戲影片,請訂閱小弟Snakie何師傅的YouTube頻道!多謝收睇,謝謝你,再見諸位!

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Snakie002

Snakie002 澳洲毒撚,沉迷遊戲三十載。無實力唯有用毅力,推崇「用心打機,享受遊戲」宗旨。我得,你都得!

追蹤

Facebook 更多文章 網站