【遊戲新聞】《Last of us Part II》全球大炎上 會否影響 PS5 主機銷量?

《The Last of us Part II》理論上係 PS4 最後一隻萬眾期待嘅大作,推出之後成功打敗《動物森友會》,成為最多玩家討論嘅遊戲。綜觀各地玩家評價,《The Last of us Part II》無疑係令玩家失望的,網上甚至有玩家話因為今次事件,而對 PlayStation 失去信心。仲有幾個月就出新機,喺呢啲關鍵時刻出事,PS5 主機銷量會否受影響,我地又分享下自己睇法。(注意下面有《The Last of us Part II》小劇透)

 

 

《The Last of us Part II》令大部份玩家心生厭惡,劇情嘅「破格」當然係最主要原因,要玩家操控一位你所憎恨嘅角色(仲要培育佢嘅技能同強化武器),而且佢仲係你最終要殺嘅目標,會令人玩得開心?當然,有人話製作人同劇本寫手係想大家去思考仇恨同復仇嘅代價,但係我喺遊戲中領悟嘅就係「斬草不除根,春風吹又生」同埋「大愛寬恕」。為免大家誤會,我所講嘅「大愛寬恕」係玩完你唔講粗口。(而且香港人自舊年反送中事件後,大愛左膠同體諒敵人應該係最乞人憎嘅事件)

 

呢幅圖的確好諷刺

 

遊戲令人失望,更令人失望嘅係廠商嘅處理手法。遊戲未推出之前,外國媒體一致給予接近滿分評價、宣傳片刻意用剪接誤導玩家、全家玩家炎上後疑似打壓負皮聲音(詳情)、製作人訪問火上加油等等(詳情),都係令玩家既失望又憤怒。

 

到底有幾多人比呢張圖呃咗?

 

咁點解《The Last of us Part II》令玩家失望,會影響到 PS5,呢度就要講返少少 Background。《The Last of us》系列由 Naughty Dog 工作室製作,而呢間工作室係索尼互動娛樂旗下子公司。2007 年推出《Uncharted》系列並大受歡迎,直到 2013 年推出《The Last of us》後,實力備受玩家肯定,話佢係 PlayStation 皇牌工作室一啲都唔過份,佢哋嘅作品更加係唔少玩家買機必入之選。

 

其實我都幾鍾意《Uncharted》系列

 

一間咁重要嘅工作室,喺新世代主機仲有幾個月就面世時出事,你話點會無受影響。當然,主機廠商有出色嘅自家作品,自然係一大賣點,但係玩家買機都唔會只著眼一隻遊戲,仲會睇有咩獨佔作品再揀買邊部機。咁我地又不如睇下已公佈 PS4 & Ps5 有咩獨佔大作。

 

 

最快推出嘅獨佔遊戲,梗係《Ghost Of Tsushima》,緊接其後嘅就係萬眾期待嘅《MOBILE SUIT GUNDAM EXTREME VS. 極限爆發》,然後仲有《Marvel’s Iron Man VR》、《Quantum Error》。至於黎緊嘅 PS5 已知獨佔又吸引嘅作品有《Horizon Forbidden West》、《Marvel’s Spider-Man: Miles Morales》、《Gran Turismo 7》、《Demon’s Souls》、《Godfall》等等。

 

 

有趣嘅係,其實大部份大作例如《Cyberpunk 2077》、《Biohazard Village》、《Pragmata》、《Project Athia》、《Ghostwire: Tokyo》、《Hitman 3》、《Scarlet Nexus》等遊戲,多數都有埋 Xbox Series X 版本或者 PC 版本,又根據近呢幾年各大遊戲廠嘅市場策略,其實絕大部份嘅作品都係多平台共有,就算強如《Monster Hunter World》都係有 Xbox One 版本的(係咪唔知呢!)。另外,Xbox 陣營其實仲未出招的,要等到七月先會公佈首發有咩遊戲。

 

三上真司新作《Ghostwire: Tokyo》其實係有 PC 版的

 

如果你問我,以玩家角度暫時 PS5 真心有興趣嘅其實得《Horizon Forbidden West》同《Demon’s Souls》。又睇返玩家買新機多數取決於三樣野:價錢、會買該平台嘅朋友、有咩遊戲。由於《The Last of us Part II》事件,令玩家對 Naughty Dog 產生抗拒嘅情緒,對 PlayStation 黎講就好似無咗一位猛將一樣。所以喺現階段,新世代主機戰未開打 PlayStation 已經讓緊單手,係咪穩贏仲係未知之數,唔好忘記對手喺 360 年代係非常強勁的。

當然喺玩家角度,你二個鬥餐死就等於我地有大量好 Game 玩,有咩所謂 :)。(我係咪都買晒二部機架啦)

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章