早年 Rogue-lite 類型遊戲興起，即係有重複死亡，隨機生成迷宮元素嘅遊戲，近年最為人所熟悉嘅當然要數到《Dead Cell》。但其實最早興起呢類遊戲時，《Rogue Legacy》曾經係呢個類型嘅代表作之一。喺兩年開發商 Cellar Door Games 就公佈系列續作，並喺同年七月進行搶先體驗，相隔兩年後終於要出正式版啦。

《Rogue Legacy 2》同前作一樣，有傳統 Rogue-lite 要素，遊玩方式就類似《惡魔城》咁，屬 2D 橫向動作遊戲。遊戲繼承前作有趣設定，雖然同其他 Rogue-lite 遊戲一樣要重複死亡，但係本作角色死亡後，係由佢嘅「子孫」繼續冒險，並隨機「遺傳」上任角色部分能力。「遺傳」能力聽落去好正，但係就連衰野都有機會「遺傳」，例如大近視（周邊視野變模糊）、變得勁大隻（被擊中判定增大）、不停放屁（純搞笑）等等。雖然呢啲負面能力會影響攻略迷宮，但係得到嘅報酬亦會相應增加，有好有唔好啦。

死咗之後喺大廳中會被掛上畫像，紀念自己點死

另外每位子孫都有各自擅長嘅職業，針對唔同職業又會對應唔同武器。例如遊俠可裝備弓箭、廚師裝備湯勺等等，喺搶先體驗版本入面會有 4 種角色類型，35 種隨機特性供玩家選擇。另外今集仲新增擁有永久能力嘅「傳家之寶」，配合返遊戲「家族」主題。

《Rogue Legacy 2》預定於4 月 28 日結束搶先體驗階段並推出正式版，現時已有超過 700 種以上房間供探索，並且有多種敵人及 Boss 挑戰。另外官方會持續進行更新改版，加入更多元素及職業。