【遊戲新聞】NS糞級新作引起熱潮 《Final Sword》挑戰任記的可疑作品

以前超任、PS 年代因為資訊不流通,但係「買」Game 又極平嘅關係,所以成日玩到糞作。隨住資訊變得流通,今時今日糞作已經變得稀少。不過你又點估到,近日 Nintendo Switch 上面就推出一隻無人識嘅遊戲《Final Sword》,有勇者購買後發現問題多多,最勁嘅係佢夠膽死侵犯任記版權。由於呢隻遊戲糞嘅程度已經去到一個唔知點吐糟位,反而引起日本網友關注並廣泛討論。

 

 

《Final Sword》由 HUP Games 製作,屬於角色扮演動作遊戲。遊戲於 7 月 2 日發售,有幾位勇者買咗之後,玩落就發現箇中嘅「樂趣」,當中最大嘅發現就係《Final Sword》入面某個場景嘅背景音樂,根本就係《薩爾達傳說:時之笛》入面嘅「ゼルダの子守唄」,疑似侵權行為公然發生,最利害嘅係本作對應平台係 Nintendo Switch,同直接挑任天堂機無分別……。

 

BGM 出事之後,任記迅速地將遊戲下架,而 HUP Games 被日媒追問時,回覆話其實佢地從正常途徑購買歌曲版權並將其應用於遊戲內,目前正與版權持有人聯繫。如果 HUP Game 所言屬實,即係有某間銷售音樂版權嘅公司非法出售任天堂資產,都咪話唔大膽。

另外根據最新嘅消息,《Final Sword》被下架原因係 BGM 出現問題,現時 HUB Games 已經進行更換 BGM 作業,並希望於作業完成後恢復發行。

 

 

BGM 問題以外,《Final Sword》擁有各式各樣嘅「特點」,呢「特點」莫名奇妙的有笑點,成為遊戲另類賣點。遊戲畫面粗糙呢點非常明顯,而佢嘅物理引擎亦都非常奇妙。遊戲戰鬥系統非常之「玄」,會發生角色作出攻擊,但並無攻擊判定嘅奇怪現象,有「劈空氣」感覺。

 

動作遊戲常見嘅移動平台,玩家走上去之後唔識得跟住平台移動,走上去之後要 Keep 住向前跑,如果你慢得濟就會跌出平台,硬生生逼你原地跌死……真係唔知好嬲定好笑。

 

仲有其他精彩影片,真係越睇越好笑。

 

《Final Sword》呢隻咁精彩嘅遊戲,短期內喺 Nintendo Switch 都買唔到,如果好想挑戰的話,其實仲有 iOS 同 Android 版本,想做勇者其實唔係想像中咁難 XD。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章