【遊戲新聞】《The Last Of Us Part II》製作人 Neil 繼續反社會「對虛擬角色咁認真係玩家腦有事」

 

原為 PS4 退役前最受注目大作《The Last Of Us Part II》推出之後,注目就注目喇,不過就係以極度炎上嘅方式!遊戲個劇本令到唔少玩家質疑工作室嘅用心(編輯部感想按此),後來遊戲製作人兼 Naughty Dog 工作室 VP「Neil Druckmann」不斷四出接受訪問嘗試為批評之聲解畫(解畫訪問按此),但係每解釋一次就火上加油多一次。

Neil 先生於 7 月 4 日又有新野,面對住玩家近乎一面倒「Joel 唔應該被咁樣殘殺致死」嘅批評,曾經揚言「自己與配音員們是最愛 Joel 的角色」嘅 Neil 於自己個 Twitter 上面就咁講:

 

 

中文解釋簡單黎講就係「喂,我知你地好鍾意我地作出黎嘅角色喎,但係師兄,佢地假架,作出黎架咋,你知架可?有病睇醫生呀,對虛擬角色咁上心係你地個腦有事呀~」

 

 

Naughty Dog 話哂都係 SIE 旗下工作室,推出《The Last Of Us Part II》諗住幫 PS4 埋個靚尾,點知搞到咁,Neil 仲要日日出黎「同玩家互動」,呢種宣傳手法都未免太反社會同埋太另類。Reddit 同埋 Twitter 上面已開始有聲音話未來唔會再玩有 Neil 份製作嘅遊戲,我反而好奇到底今次呢壇野可以點收科呢?

利申:我都係飲 PlayStation 奶水大,我熱愛 Sony,我熱愛 SIE(頭盔)不過我同時都係一個熱愛遊戲嘅玩家,因為遊戲同角色係虛擬嘅就唔應該對佢太認真?到底有幾多玩家會認同呢句說話呢?

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章