【遊戲評測】PSVR最後一隻「大作」 《Iron Man VR》真係稱得上係「遊戲」

PSVR 呢舊野出咗都好幾年,身邊有買嘅朋友絕大多數部機都係處於「封塵」狀態,原因不外乎係「都無 Game 玩」。老實講,芸芸咁多 PSVR Game 入面,自己仲會玩嘅都係得 From Software 嘅《Déraciné》、打 CALL Game《IDM@CGVR》(唔毒得咩!)同埋《Ace Combat 7》,大部份 PSVR Game 真係似 PowerPoint 多過似 Game。慶幸日前試玩 PSVR 最後一隻「大作」 《Marvel’s Iron Man VR》,感覺終於似返隻「Game」。

 

 

《Iron Man VR》簡單講就係比玩家體驗做「Iron man」嘅感覺。雖然唔係 Open World,但係每關都有頗大嘅空間比大家周圍飛,操控性亦算合格。遊戲故事講述 Tony 被不明勢力攻擊,波及 Pepper,於是 Tony 就決定要搵出犯人並報復。遊戲基本流程都係劇情 > 升級裝備 > 任務,每關遊玩時間都有返咁上下,而且互動要素都算多,都算有誠意。

 

Friday 喺 《Marvel’s Iron Man VR》個樣,算係不過不失啦

每關都有頗大嘅空間比大家周圍飛,係幾爽皮

 

遊戲戰鬥系統明顯比起其他 PSVR 更為成熟,基本攻擊方式有手心射出嘅「急速衝擊波」、同埋儲力後使出嘅「火箭拳」,隨住劇情推進,玩家將得到「智能飛彈」、心口大型「集束炮」等武器。至於敵人方面,係低 B 企喺度射果種,而係 Keep 住移動以及射出有誘導性攻擊(部份敵人仲識得加速逃跑),玩家要把握時機用「瞬間加速」閃避,同時又要兼顧瞄準及攻擊,玩落的確係歡樂。

 

戰鬥系統以 PSVR 黎講算係做得唔錯

最好玩係近戰儲力出拳,可以打完右拳打左拳咁不停 Loop,敵人會比你打到彈下彈下,好過癮

 

戰鬥以外,遊戲包含解謎元素,不過就係白痴級數。另外,PSVR 遊戲一貫通病喺《Iron Man VR》入面亦得到完美嘅繼承。例如要你喺限時內,拉開並旋轉機關,但係伸手去握住把手呢個咁簡單嘅動作,可以反覆試幾十次都伸唔到隻手出去,真係玩到你嬲。

 

可以搞成分鐘都伸唔到隻手出去

玩 VR 最開心梗係做低B野,反手飛行!

 

總結

今年年尾就出 PS5,會唔會有新一代 PSVR 仲係未知之數,不過就幾肯定《Iron Man VR》會喺最後一隻 PSVR「大作」。

累積幾年技術後,由 PowerPoint Game 進化到真正係一隻遊戲,的確有飛躍性嘅進步。《Iron Man VR》畫面、遊玩性、操控性雖然唔算係頂級,但係以 PSVR 嘅水平黎計真係算交足功課。最起碼我玩完頭幾關之後,仲有興趣玩落去。

最大缺點當然就係上面提到一貫 PSVR 通病,你無辦法感應細緻動作,就無謂整咁多需要微細操作嘅機關,只係自曝其短。但係遊戲入面,玩家扮演 Iron Man 飛黎飛去呢 Part 真係做得唔錯,如果玩法更自由的話,相信一定會帶比玩家更高嘅享受。

 

評分:7.5 / 10 (可改善地方較多,期望續集做得更好,如果有的話)

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章