【遊戲新聞】耕田溝打鬼動作遊戲 《天穗種稻姬》越食得好越好揪

琴晚任記 Nintendo Mini 線上發表會入面,雖然有一大堆注目大作,但係我地反而比較留意由 EDELWEISS 開發嘅《天穗種稻姬》(天穂のサクナヒメ)。琴晚放咗條內含實機戰鬥系統展示嘅宣傳片,以及講解新穎嘅「耕田」系統,並且宣佈埋發售日期。

 

 

《天穗種稻姬》(天穂のサクナヒメ)其實早喺 2016 年時已經發表,之後每年都有新片發佈,但直到今日先知道正式發售日期。遊戲混合橫向卷軸動作及模擬耕田,前者於迷宮中擊殺惡鬼,後者則係育成強化角色。至於故事部份就比較簡單,主角係武神父親同司掌作物豐收嘅豐穰神母親個女,受到眾神指示,與逃避離戰亂嘅人類去到「ヒノエ島」,並且協助人類開墾土地,同時保護佢地不受島上惡鬼襲擊。

 

 

遊戲戰鬥系統有趣,基本動作有左右移動、跳躍、弱攻擊、強攻擊、技能攻擊、迴避。另外角色身上有「羽衣」,可以當做飛索類道具幫助移動,亦可以綁喺怪物身上快速移動換位避招,甚至可以綁住小型怪物再「Fing」佢出去打人。基本攻擊連段可以由地面打到上天,然後再轟飛敵人「炸」落其他敵人度做成傷害,打擊感實在而且非常爽快。

 

「羽衣」有啲似隻狼入面嘅飛索

打擊感做得非常好

 

耕田部份非常細緻,由揀種子、翻土、插秧、收割、脫殼等等過程一應俱全,而且仲會慢慢有改良耕種道具使用。例如初頭要用鋤頭翻土,之後就有牛幫手咁。當種植物收成後,就可以將農作物製作成料理,如果喺打鬼果陣得到「油」的話,仲可以整埋炸物,幾過癮。

 

自己落田種米

主角食得越好的話,就會越好打,好真實

 

《天穗種稻姬》(天穂のサクナヒメ)將於今年 11 月 12 日發售,對應平台為 PS4、Nintendo Switch。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章