【遊戲新聞】玩家自製薩爾達式玩法 《Bloodborne》2D版免費下載

由 FromSoftware 製作嘅《Bloodborne》(血源詛咒)絕對係出色作品,但由於係 PS4 獨佔,到現時都仲未推出 PC 版。於是獨立遊戲製作人 Max Mraz 就以《Bloodborne》為藍本,整咗隻 2D 版本遊戲《Yarntown》,比一眾 PC 玩家感受下喬巴同神父嘅威力。

 

 

《Yarntown》使用 Solarus 引擎製作,係一隻平面動作遊戲,採用像素風格。遊戲好似初代《薩爾達傳說》咁,使用俯瞰視角。基本操作有近戰攻擊、儲力攻擊、開槍、翻滾同埋飲水。同原版一樣,進行攻擊及翻滾都會消耗耐力,戰鬥時要留返少少耐力碌走。另外《Bloodborne》入面受傷後快速攻擊敵人回血呢個設定都有重現,真係估佢唔到。

 

 

起始地方係獵人夢境,玩家會遇見人偶瑪麗亞,之後就踏上旅程進入雅南。版圖設計上見到 Max 佢極力還原雅南地圖,包括打喬巴時嘅大橋,墓地等等。現時遊戲只有喬巴(聖職者の獣)同神父(ガスコイン神父)二隻 Boss,不過神父就並無還原變身呢點,有啲可惜。另外遊戲入面可供探索部份頗少,完整攻略整個遊戲大約 30 分鐘就搞掂,算係過下癮咁。

 

喬巴外型做得頗似

作為卑鄙的外鄉人,梗係要卡位打!

 

《Yarntown》已經喺 Itch.io 提供免費下載,支援手制遊玩。PC Window 玩家下載後解壓執行「yarntown.exe」就玩到,Mac / Linux 玩家就要下載埋 Solarus launcher 先玩到,敬請留意。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章