之前有套電影叫《別相信任何人》，套戲好唔好睇就見仁見智，但係就覺得呢句說話好有故事性。由獨立團隊 imaginarylab 製作嘅《Willy Morgan》，同樣地被囑咐「別相信任何人」，仲要係一款懸疑解謎遊戲，對我黎講主題真係非常吸引。

《Willy Morgan and the Curse of Bone Town》係一款指向點擊型懸疑解謎（point-and-click），現時一般平台比較少呢類型嘅遊戲，主要以點擊指示角色移動及進行各類動作，《Clock Tower》最為人所熟悉嘅同類遊戲。《Willy Morgan》以奇幻及海盜世界為主題，同時包含現代原素，古今交錯。

遊戲故事講述主角 Willy 嘅爸爸係一位著名考古學家，但係已經失蹤咗成十年。突然間有一日 Willy 收到爸爸嘅信，要求佢立即起行去一個地方，並且唔好相信任何人，於是 Willy 就出發啦。遊戲以對話及頗有難度嘅謎題為主軸，配以非線性故事進程，玩家可以自由探索多達五十多個地區。

《Willy Morgan and the Curse of Bone Town》預計於今年內上市，對應平台為 PC Steam，現時正提供試玩版下載。