【遊戲介紹】去異世界成為酒館老闆《Travellers Rest》湊客釀酒一腳踢的模擬經營遊戲

 

《Travellers Rest》係一隻酒館模擬經營遊戲,由英國獨立工作室 Louqou 製作,Metaboli Publishing 發行,對應平台為 Steam,現正進行 Early Access,定價 HKD 76,截至 2020 年 8 月 5 日前入手遊戲仲可獲九折優惠。

《Travellers Rest》嘅故事舞台設於一個充滿幻想歷險風格嘅異世界,玩家於遊戲當中,飾演破舊酒館嘅店主,目標係要將酒館變成繁榮而受歡迎嘅旅客熱點。開發團隊表示,《Travellers Rest》嘅意念深受《Stardew Valley》以及《Graveyard Keeper》嘅啟發,所以同樣地使用類似嘅點陣圖風格去開發呢隻經營遊戲。

 

 

要成為出色嘅酒館,最重要嘅係要有靚酒。玩家必須自己釀造啤酒、威士忌及紅酒,亦需要發掘各種食譜以及物品嘅製作方式(包括種田!)。隨住你嘅酒館越做越好,玩家就會升級,並得到技能點數,從而去發展「自然」「建築」「料理」「醸造」「社交性」及「魔法」六個技能領域。

 

 

喺呢個 RPG 風格嘅異世界中,酒館每日都會遇到各式客人,例如係劍士、勇者、菜鳥冒險者等等。

 

 

為左令佢地願意付出更多住宿費/成為常客,玩家亦需要花心機佈置酒館嘅旅店部份,呢部份就有少少似好耐以前一隻 PC 模擬遊戲《酒店大亨》,每間住房都要有指定傢俱,如果能夠錦上添花整靚間房,就能更令客人滿意,多謝金主。客人離去後,玩家亦需要整理房間。

 

 

假如客人滿意你嘅服務,你嘅評價就會上升,而成為熟客嘅客人,仲可能成為你嘅伙伴、朋友甚至女朋友!

 

 

《Travellers Rest》可以話係集大成於一身嘅多彩經營遊戲,目前於 Steam 嘅 Early Access 期間,獲得「極度好評」,假如你最近無野好玩,而又有時間玩一隻極度令人沉迷嘅模擬遊戲,呢隻《Travellers Rest》相信係大家最近可以考慮嘅選擇!

遊戲英語為主,對應日語及殘體中文。

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章