【遊戲介紹】媒體搶先試玩報告 《Marvel’s Avengers》四人同遊戰鬥系統極佳

喺 2019 年 E3 發表嘅《Marvel’s Avengers》,一直都無放過試玩台出黎,所以一般玩家咁耐以黎都只可以睇片知道隻 Game 大約係點。我地早前就收到邀請,搶先試玩《Marvel’s Avengers》嘅 Beta 版本,內容比起之前玩過嘅版本更豐富,操作更優異,最估唔到嘅係連線合作做得幾唔錯!

 

 

《Marvel’s Avengers》由曾製作新版《 Tomb Raider 》(盜墓者羅拉)工作室 Crystal Dynamics 聯同 Eidos Montreal、Nixxes Software 及 Crystal Northwest 共同開發,採用第三身視點,屬動作冒險遊戲。今次 Beta 版本前半部份其實係遊戲序章,除咗向大家敘述故事之外,亦係教學關卡。順帶一提,《Marvel’s Avengers》係有全新故事及背景,所以並非係電影嘅延續(雖然我已經自動腦補返啲人樣……)。

 

 

遊戲序章會有五位可玩角色,分別係美國隊長、Iron Man、黑寡婦、雷神同埋 Hulk,隨住劇情推進會有第六位角色 Ms. Marvel(Kamala Khansi)使用。根據之前製作人 Casey Lynch 所講,未來會陸續有其他角色及劇情以 DLC 形式登場,而且費用全免!另外蟻人、鷹眼同蜘蛛俠已經確認會登場。

 

 

《Marvel’s Avengers》同一般動作遊戲操作相似,主要攻擊都係分輕、重攻擊鍵,另外仲會有角色獨有必殺技。但係本作有個地方做得好好,每一位復仇者都係獨立設計,不論係拳腳判定、招式,特技都截然不同,而且唔係求期轉招式同 Skin 就話係新角色,係連系統都有所分別。例於 Iron Man 有地面戰嘅一般戰鬥模式;有滯空射擊模式;仲有高速追擊模式,會變到好似飛機 Game 咁玩,完全落足心機去整,唔似隻《Marvel Ultimate Alliance 3》咁,差唔多隻隻角色招式都差唔多,高下立見。

 

Iron Man 高速追擊模式,會變到好似飛機 Game 咁玩

黑寡婦可以射條飛索出黎,Fing 自己上高位,好有蜘蛛俠 Feel

 

除咗 Iron Man,製作團隊亦好好用心去表達出每個角色之間嘅差異,例如雷神可以儲力放電同掉雷神之鎚,而個鎚收回時都會有攻擊判定,亦即係話可以靠走位去擊倒多位敵人。而個人最欣賞嘅就係 Hulk,招牌技「Hulk Smash」還原度十足,又可以隨地拆野掉,技能樹升級之後仲可以拆野做武器,非常爽皮!

 

技能樹升級之後可以拎起大型瓦壢,要黎掉人又得,做武器拎黎「Fing」都得

 

上面提到嘅角色獨有必殺技,係本作一大賣點。超必殺技有多種型式,例如 Hulk 嘅拍掌係 1 次性大範圍攻擊類型,亦有如 Iron Man、黑寡婦長時間強化類型。當中最正嘅就係 Iron Man 使用超必後,會變成 Hulkbuster,擁有超強攻擊力及防禦力,基本招式亦都全部變為 Hulkbuster 版本,好霸道!

 

 

不過講到最令人意外嘅係,整體操控技術做得非常優秀。玩開立體動作遊戲嘅朋友,相信好多時會面對一個情況,就係打打下變咗打空氣。喺呢隻遊戲入面,遊戲會預設你鎖定最近嘅敵人(唔洗 Lock),自動加長攻擊距離,減低打空氣機會。當連續攻擊進行中,就算鏡頭轉向搜尋下一個目標,亦唔會因鏡頭改變而甩招,另外當面對眾多敵人時,揀選攻擊對象亦唔困難。雖然呢啲系統睇落係基本野,但現時好多遊戲都忽略咗呢個部份,難得製作團隊肯重視呢樣野,極之抵讚。

 

遊戲難度拿捏得幾好,我係玩 Hard Mode(次高難度),已經會成日死,要思巧殺敵次序,用技時機

HARM 訓練屋會教你基本單人及團戰技巧,例如點破防,做得唔錯

 

遊戲除咗戰鬥系統做得好,仲有解謎元素,而且都幾有難度。另外因為要刷裝,耐玩性亦都一流。根據官方影片所講,多人任務除咗十零分鐘小任務外,亦有長達 2 小時嘅大型任務,的確係吸引。順帶一提,多人任務係一次過開放一堆任,然後推晒之後再開放一堆,唔洗逐個任解鎖。

 

刷裝配裝玩落唔錯

好多謎題都唔容易

 

《Marvel’s Avengers》預計於 9 月 4 日推出,對應平台為 PS5 / PS4 / Xbox One / Xbox Series X / PC Steam / Google Stadia。另外有預購 PS4 版本嘅朋友,黎緊 8 月 6 號都有得優先試玩呢次嘅 Beta 版,而且進度會部留到正式版。

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章