【遊戲評測】極優秀即時戰術遊戲 《Desperado 3》值得拎「最佳遊戲」

現時最受玩家歡迎嘅遊戲類型,不外乎都係動作+開放世界類型,比較著重於即時反應。但係對於有返咁上下機齡嘅玩家,昔日極考腦筋嘅「即時戰術遊戲」到今時今日仍然津津樂道。可昔近年即時戰略遊戲風光不再,連帶極 Hardcore 嘅即時戰術遊戲都近乎絕迹。幸好,當年紅極一時嘅《Desperado》終於推出最新一集,遊戲優秀程度獲得 VJGamer 編輯部一致認同最值得拎今年 Game of Year(最大對手《Cyberpunk 2077》)。

 

《Desperado 3》得到媒體一致好評,唔洗擔心,今次個評分係堅的

 

「即時戰術遊戲」(RTT)對現時玩家黎講可能比較陌生,佢係「即時戰略遊戲」(RTS)衍生類型。以實時方式喺模擬戰場環境入面,對人物或部隊進行戰術指揮。RTT 同 RTS 最大分別就係無需採集資源、唔洗起野,比較專注於兵種/角色運用,以及戰術運用。喺「即時戰術遊戲」盛行年代,呢個遊戲種類嘅代表作當然係《Commandos》,而喺呢個類型入面,以西部為主題嘅代表就係《Desperado》。

 

「即時戰術遊戲」(RTT)專注於兵種/角色運用,以及戰術運用

 

《Desperado》由德國遊戲廠 Spellbound Entertainment 開發,於 2001 年推出。當時《Commandos》成功製造 RTT 遊戲熱潮,又因為《Desperado》以西部賞金獵人為主題,成功喺打入市場並得到絕佳嘅口碑及銷量(現時 Steam 都係「極度好評」),所以喺 2006 年推出續集,並且隔年出多隻資料片。但後來因為遊戲廠破產,加上 RTS、RTT 遊戲熱潮不再,令到《Desperado》一直都無新作推出。慶幸得到呢個 IP 嘅 THQ Nordic 搵到 Mimimi Games 去製作第三集,令玩家喺 2020 年仍然可以玩到呢隻絕頂出色嘅作品。

 

對 Fans 黎講,無諗過仲有機會見到《Desperado 3》

 

《Desperado 3》係最新一集作品,雖然係第三集,但故事背景可以話係整個系列嘅起源,就算無玩過之前幾集亦都完全無問題,所以不論有無玩過舊作,都推薦由呢集開始玩。另外估計製作團隊思考到現世代玩家可能完全無玩過舊作,而舊作面世距離現今都差咗十幾年,為照顧所有玩家所以先將劇本設定為起源,非常有心。

 

雖然以整個系列嘅起源做藍本,但係第一關就係向舊作致敬嘅「劫火車」,舊玩家一定有共鳴

 

遊戲基本玩法就好簡單,喺一個大型場景中,佈置大量平民、巡邏人員、敵人,玩家要利用各成員特點去潛入、躲藏又或者擊殺對方,到達目的地或完成任務。概念簡單,但係執行上極有挑戰性。敵人同樣有各式各樣嘅特性,例如視線唔會離開嘅守衛;緊守崗位寸步不離嘅斗蓬守衛;警覺性高絕大部份陷阱無效嘅長衣人等等,因應各人特性延伸出無限可能性。玩家可以用聲東擊西、正面突破、潛行暗殺、刻意露出破綻等手段,同一關卡但有 N 種手段突破,正正係呢隻遊戲嘅魅力所在。

 

角色技能各有所長,但差唔多每樣技能、道具都有使用上嘅風險。例如開槍會造成巨大聲浪,引起敵人警戒。藍色圈就代表發出聲浪嘅範圍。

例如 Doc 技能,投出公事包吸引敵人查看,打開後會施放毒霧令敵人盲目 2 秒左右,如果無趁機擊殺佢的話,敵人會因此起疑而四處查看

Kate 強勢技能偽裝,使用後可以勾引男性敵人,令佢地離開身處崗位,但需要先得到偽裝用嘅衣服,通常都收埋喺極難進入嘅地方

圖示為混合技能示範,先喺敵人視線路徑上放置 Doc 公事包,引敵人偏離本身巡邏路線,接近時再用 Kate 掉香水令平民盲目,趁呢個時間擊殺敵人&藏屍

 

遊戲需要潛行嘅時間佔絕大多數,經常要思考敵人視線、用咩方式解決敵人、搬運屍體所需時間、藏屍地點等等全部都係考慮範圍,但敵人配置用心險惡,基本上敵人係環環相扣,殺一人就會牽動幾人。呢個時侯就要做戰術設置,部署多位角色行動,喺一瞬間擊殺多位敵人,令佢地無法呼叫求援。另外呢類型遊戲因為經常重覆嘗試 > 失敗呢個過程,所以要成日 S / L,儲存及讀取速度就變得極為重要,喺《Desperado 3》入面 S / L 速度係超快,值得一讚。

 

部署中時間會暫停,可以慢慢構思戰術可能性(最高難度不會暫停)

好多時成功殺死敵人,但仍然被發現,未必係戰術錯誤,可能係時間掌握得未夠準確。因為好多時靠嘅係守衛分心又或者擰轉頭嘅一刻,得短短 1-2 秒

 

固有殺敵、潛入方法外,遊戲中有大量物品可供使用,例如將教堂上嘅大鐘整跌壓死下面班人、引敵人去路軌上面等火車撞死佢等等。當中最為有趣嘅係部份關卡敵人頭目有自身喜好,例如第二關其中一個頭目鍾意喺自己間房度,嘆住啤酒睇跳舞。當我地得到呢個情報後,搵出斟酒嘅地方並喺酒中落毒,咁就可以殺人於無形。

 

喺酒中落毒殺人於無形

我最愛嘅殺人手法:勾引人去路軌上面等火車撞死佢

 

遊戲玩法簡單,但戰術、技巧接近無限,要學識各種技巧,教學就顯得格外重要。《Desperado 3》喺每個角色嘅教學上做得極好,令玩家可以喺短時間掌握技能特性、角色移動速度、可進行動作等等,但又唔會畫公仔畫到出腸教晒你點做,留返思考空間比玩家。

 

角色們有各種特性,例如爬籐蔓、游水等,唔係個個都得

因應體力及體型,角色間嘅移動速度都頗大分別,健碩嘅 Hector 可以手執二條屍而唔影響步行速度,弱質纖纖嘅 Kate 就只能夠喺地上拖行屍體,同埋只能夠打暈敵人,無法直接擊殺

 

遊戲劇情甚有水準,而且節奏流暢,玩得好爽。故事背景同《Red Dead Redemption》一樣係講西部,不過前者就係以「幫派」角度去描述,而《Desperado》就以「人」角度出發,所以整體表達比起前者更「地」。亦因為呢個緣故,喺部份關卡存在住「市集」、「大街」等平民聚集嘅地方,會聽到好多佢地之間嘅日常對白,令人更投入了解呢個西部世界。

 

NPC 嘅日常對白有用心整,製作團隊陣係塑造緊一個「世界」

 

總結:

《Desperado 3》係近年少見嘅「即時戰術遊戲」,但唔代表呢個類型唔好玩,反而係要將呢個類型做得好玩係非常之困難,因為嘅要顧及敵人分佈、慣性,又唔可以設定得太苛刻,但太簡單又令人覺得無聊。Mimimi Games 就各種設定拿捏得非常準確,令人一玩上癮,亦都敢講係近十年最出色嘅西部即時戰術遊戲。但問題在於本作嘅吸引力只限於肯用腦解謎、挑戰難度嘅玩家,相對唔喜歡呢類遊戲嘅玩家,吸引力可以話係零。

現世代缺乏即時戰術遊戲,想玩到下一集都唔知要等到幾時,未接觸過同類型遊戲嘅玩家絕對推薦一試。本作嘅質素只能用極之優秀黎形容,我哋 VJGamer 編輯部亦都一致認為《Desperado 3》最值得拎今年 Game of Year。(當然仲有最大對手《Cyberpunk 2077》)。

《Desperado 3》已經推出,對應平台為 PlayStation 4 /  Xbox One / PC Steam / Mac OS / Linux。

 

編輯部評分:9.5/10 (結局有少少趕收工、無二周目)

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章