【遊戲介紹】成為教主建立自己的天下《Honey, I Joined A Cult》超多元惡搞教團經營遊戲

 

由 Sole Survivor Games 製作,並由 Team17 發行嘅全新惡搞經營遊戲《Honey, I Joined A Cult》將於 2021 年於 Steam 平台上開始 Early Access。遊戲以流行「嬉皮士」嘅 70 年代作為背景,玩家將會飾演「教主」,目前就係要募集信眾,從而創立只屬於你嘅異端宗教社團。

 

 

雖然話係異端,但係《Honey, I Joined A Cult》並唔係走恐怖路線,反而係一隻輕鬆並帶有少許惡搞成份嘅多元經營遊戲。玩家需要建立自己嘅據點,吸收新信徒(金主),並將社團加以擴展,從而提昇自己於社會上嘅影響力。

要提昇信眾嘅信仰之心,玩家必須要喺據點裡面不斷增建各種微妙嘅「信仰設施」,例如係催眠用房間、測謊機、天啟水池、靈魂室(寫完都唔知咩黎…)等等。

 

 

但係信徒並唔係苦行僧,玩家亦需要提供理想嘅居住環境,令佢地可以安心「禪修」,除左基本生活設備,例如床、起居室、洗手間等等之外,同時要準備埋各種娛樂設施、飯堂、圖書館等。信眾生活得好,佢地課金比教團嘅金額就會越多。

玩家亦可以為教團設定制服、規條、設計周邊(?!)。

 

 

隨住教團知名度上升,就會開始會有惡意媒體攻擊、亦會有政府組織黎打壓,甚至會出現「生意競爭對手」,即係另一個教團想黎挖你啲金主走,點樣克服呢啲問題,將係玩家嘅挑戰及遊戲任務。

 

 

《Honey, I Joined A Cult》將於 2021 年開始於 Steam 平台上進行 Early Access,有興趣嘅朋友記得 Sub 定先喇!

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章