【遊戲新聞】追加新關卡情報 《Fall Guys》廠商Fans齊出手整Skin

《Fall Guys: Ultimate Knockout》全球大熱,搞到我地編輯部晚晚都不務正業。遊戲搞笑歡樂,有競技性但又唔會搞到朋友間鬧交,呢種特點令到玩家樂意加入,甚至遊戲廠商亦有興趣同《Fall Guys》合作,例如 CDPR。要維持遊戲壽命,當然要持續更新以及玩家對遊戲嘅投入度。日前《Fall Guys》就正式追加新關卡情報,同時有各大廠商同 Fans 整糖豆人 Skin,唔少非常高質。

 

 

《Fall Guys》官方 Twitter 出咗條 Tweet,內容係新關卡「Jump Showdown」嘅遊玩影片,玩家身處一個圓型平台,中間有一高一低不停旋轉嘅棍,要喺棍到達前跳起或企定避開,同時腳下嘅平台會逐格消失,留到最後者勝。本關卡喺 Beta Test 果陣曾經出過,並大受歡迎。預計於明日更新時加入本關卡,另外稍後會有更多關卡及服裝推出。

 

關卡更新外,Steam 版玩家飽受外掛困擾,開發商 Mediatonic 已經表示佢地了解並且做緊野,佢地正在調整遊戲入面嘅偵測系統,務求 Ban 到更多嘅外掛使用者,所以玩家唔需要逐次舉報個別違規作弊者。不過計我話,呢啲 Game 都要出 Cheat,應該重罰啦……。

 

 

另外,因為《Fall Guys》太受歡迎,各廠商同 Fans 都出手整 Skin。暫時有份整 Skin 嘅廠商分別有 KFC、Konaimi UK、AROUS 等等,《Clash of clans》亦都表示佢地係《Fall Guys》嘅「Big Fans」。仲有唔少 Fans 創作《Overwatch》、《對馬戰鬼》、《JoJo 的奇妙冒險》、《Doom》、《Brawl Star》等 Skin,真正百花齊放。

 

《Fall Guys》係一款歡樂派對遊戲,由英國遊戲團隊 Mediatonic 製作。每場初始都會有 60 人參與,玩家使用自訂嘅角色參加各種障礙淘汰賽,喺關卡入面以達到終點又或者避開陷阱捱到最後為目標,然後經過多次小遊戲後生存到最後,成為最終勝利者。遊戲已經推出,最大支援四人同隊。對應平台為 PS4 及 PC Steam(PSN Plus 今月免費遊戲)。.

五木

五木 動漫電玩宅,極愛金田一系列,擅長動作及策略遊戲

追蹤

更多文章