各位精靈訓練員, 新一彈嘅寶可夢卡牌遊戲 劍&盾 無極力量系列相信大家都應該收集得如火如荼, 甚至應該忙緊用新卡牌砌一副自己心目中嘅卡組! 其實比較之前嘅系列, 今次新一彈官方真係非常佛心! 因為今彈每一盒大約有90%機率會中到兩對不同寶可夢嘅VMAX組合 (組合意思係同款寶可夢V卡同VMAX卡各一張), 令大家更容易得到VMAX組合去砌出屬於自己嘅利害卡組! 咁究竟今彈有咩主打嘅強勁寶可夢, 依家就同大家睇吓!

第一張要講嘅係受萬千fans寵愛, 絕對係官方親生仔嘅噴火龍VMAX! 身為最初一批御三家一直受歡迎到依家, 今彈嘅VMAX超極巨化更加係型到核爆! 而且招式仲非常有破壞力, 但要發動招式所配備嘅能量亦都相對地高, 變得比較難用, 但對噴火龍有愛嘅話絕對值得一試!

第二張必玩嘅係今彈封面寶可夢之一 無極汰那VMAX! 新登場嘅無極汰那喺精靈寶可夢 劍／盾電玩遊戲中有住壓倒性嘅強大力量, 而VMAX卡牌上嘅無極汰那完美呈現出呢份霸氣 !而且唔止得個樣, 佢嘅特性同能力亦都相當有震懾力, 身為對手遇到無極汰那VMAX一定會相當頭痛!

第三張不得不提嘅就係外型可愛而且攻擊力強嘅霜奶仙VMAX! 色彩繽紛嘅可愛蛋糕造型, 無論男仔女仔見到都一樣會內心溶化, 誓必要將佢抽到帶返屋企! 而且佢嘅實力絕對係今彈數一數二之勁, 仲可以因應自身能力同其他寶可夢卡做出多種嘅配搭, 相信會係嚟緊戰鬥場上嘅熱門常客!

第四張係有機心得嚟戰鬥力又好強大嘅巨炭山VMAX! 為咗令大家認識到更多嘅寶可夢, 有時官方會用一啲比較無咁受歡迎嘅寶可夢去製成強大嘅卡牌, 而巨炭山VMAX就係一個好例子! 首先屬性方面, 佢完美克制到今彈嘅大熱而且應該會有好多人用嘅 無極汰那VMAX, 再加上佢自身嘅戰鬥數值亦都非常驚人! 如果想殺對手一個措手不及, 巨炭山VMAX絕對係不二之選!(btw其實望耐咗都幾靚~)

第五張介紹嘅係今彈壓軸嘅皇牌 焚焰蚣VMAX! 超屈機嘅能力效果配合無人能擋嘅強大攻擊, 當時卡牌喺日本一出, 基本上各個比賽嘅優勝名次都會見到焚焰蚣VMAX嘅蹤影! 其實火系卡牌嘅配備系統一直都比其他屬性完善同穩定, 如果想一嘗喺比賽得到勝利嘅滋味, 焚焰蚣VMAX一定係你嘅最佳拍檔!

第六張係特別推介, 亦都係今彈大家夢寐以求嘅 叉字蝠V! 雖然叉字蝠V無強大嘅攻擊力, 但佢嘅特性效果絕對能令大家喺對戰中有起死回生嘅影響之用! 加上佢喺今彈嘅配置率實在係非常低, 稀有度大大提高! 一張又實用又出得少嘅卡, 大家又點能夠唔趨之若鶩呢~

以上六張算係今彈比較多人討論嘅卡牌, 但大家有興趣玩的話, 絕對唔應該只著眼熱門卡牌. 因為寶可夢卡牌遊戲其中一個引人入勝之處, 係佢嘅卡牌組合變化強大, 往往見到一啲大型比賽, 有好多唔起眼嘅卡牌組合起上嚟, 都會贏到一啲大熱牌組! 就係呢份刺激嘅驚喜令大家對寶可夢卡牌遊戲更加著迷! 勝利嘅要素並唔嚟自卡牌, 而係玩家對寶可夢嘅熱情同細心研究! 希望大家可以用手上自己心愛嘅寶可夢卡牌踏上冠軍之路!