【遊戲評測】有別於傳統足球遊戲 《足球小將 新秀崛起》識玩其實好好玩

呢二個星期值得推薦嘅遊戲有三隻,一隻係大作《Marvel Avengers》,一隻係獨立遊戲《Mortal Shell》(遲少少先有評測),仲有一隻就係今次要講嘅《足球小將 新秀崛起》(即係隊長小翼)。坊間好多人睇完片或者聽人講完就覺得有伏,如果你心態係抱住想玩舊版指令式《足小》的話,可以上一頁,又或者你係諗住佢係《FIFA》咁嘅傳統足球遊戲,你都可以上一頁。因為呢隻遊戲係同大家接觸開嘅《足小》甚至係足球遊戲都唔同,亦都好似卡 Game 咁,唔識玩的話睇片都唔知玩乜,但如果你唔係抱住以上二種心態的話,歡迎你進入《足小》嘅世界。

 

 

《足球小將 新秀崛起》由 TAMSOFT CORPORATION 開發,官方定位屬於角色扮演足球遊戲,不過實際上有同傳統足球遊戲有頗大分別,呢點喺後面會再講。循例都講一講畫面先,本作以動畫風格呈現,角色還原度絕對係 100%,原作各種必殺射門、必殺剷波等招式都有好好地重現。加上遊戲流暢度高,整個遊玩過程都係非常之爽,係衰在開場前 Loading 有少少慢,如果可以快返啲就最好。

 

雙人射球都有

 

遊戲基本上分為故事模式同對戰模式,當中故事模式又再分為操控南葛隊以制霸日本為目標嘅「小翼模式」同埋創建新角培育挑戰世界強豪嘅「New Hero 模式」。前者可以視之為認識遊戲系統基礎嘅教學模式,後者則係今集最重要兼一定係玩得最多嘅單機模式,因為培育角色可以話係呢隻遊戲最重點嘅元素,下文會詳細講。

 

「小翼模式」劇情比較短,國中制霸就完

呢度講個冷知識,大家都知日版叫「大空翼」,香港就叫「戴志偉」,台灣你地又知唔知叫咩?答案係「方育翔」勁九唔搭八….

隻 Game 非常落本,有非常多為呢隻遊戲創作嘅新角色,成隊美國隊都係未出過的(仲解答埋點解全世界人都識日文呢個問題)

「New Hero 模式」其實係有多個結局,前期可以揀武藏、東邦同富良野國中。後期結局暫時已知有四個分支,真係好有 Heart。

 

要學識睇或者欣賞呢隻遊戲,就必定要先學識佢嘅遊戲系統。前面都講過,呢隻遊戲同傳統足球遊戲有頗大分別,驟眼睇係好似《FIFA》咁玩,但係佢加入「對決」呢個元素,令佢變成每次搶波帶波都充滿變數。當角色有波在腳時,撇除傳波呢個動作,有衝刺盤球(即係跑步帶波高速推進)、盤帶動作(即係扭波過人)或者普通帶波推進;防守方就有衝撞施壓(即係高速衝埋去撞人)同剷波二個動作,但其實攻守雙方嘅動作係有互剋屬性之分。

 

「對決」係《足小》最重要嘅元素

 

例如當帶波者用衝刺盤球(R1),防守者用衝撞施壓的話(R1),就會係防守方贏,所以要用盤帶動作(R2)扭過;但係如果防守方用剷波(R2 or Ο)的話,就會被帶波者「爆開」。如果防守方剷波時,帶波者用盤帶動作(R2)的話,就會被剷走個波,呢個就係基本嘅相剋關係。但其實呢個只係基本仲嘅基本,因為仲有「精神」同「技能」呢啲變數。

 

不論係剷波定衝撞施壓,成功的話對方會喺地下度「典」,有大約 5 秒時間唔郁得(左邊條友俾我撞飛,有排唔郁得)

 

上面講到攻防有相剋關係,雖然衝刺盤球係贏剷波,但係先決條件係有「精神」。帶波者避開一次剷波後,喺無任何技能幫助下正常會消耗 6-70% 精神,基本上跑多二步就見紅。當見紅時就算你係處於衝刺盤球狀態都係會輸剷波,但如果你連續用盤帶動作扭過二位球員就會大幅補返精神。所以每次嘅對決都係玩緊心理戰,例如跑跑下收腳,亦可以靠走位呃人落剷,咁就可以慳返唔少精神。另外每當盤扭或攔截動作成功都會累績 V-Zone Bar,儲滿后發動 V-Zone 將短時間內大幅增加球員能力及回精神速度,要善加使用。

 

小志強用盤帶動作扭過二位球員就會出現「直線盤帶」動作硬爆對手!

喺呢隻遊戲入面只有越位會吹,所有剷波撞人都係無事的,放心剷爆佢!

 

簡單嘅對決講咗,但一場足球又點會得咁少野。有睇過《足小》都知道守門果班多數都怪物黎,喺遊戲入面亦有好好咁還原,但唔代表無辦法攻破。守門員同樣有「精神」,每次射門因應射球威力而削減相對嘅精神,跌到零的話真係求其都射得入。但係每次守門員嘅精神又會隨時間回復,所以每次攻門都會盡量把握機會,儲到最大力變成必殺射門先射出去(如果連過二人後儲力時間會大幅縮短)。但係當球員儲力時,防守球員不論係剷波定衝撞施壓都 100% 贏攻方的,所以又係要睇位決定再決定起唔起腳。

 

射門威力越強,削減守門員精神就越多

不過有時都可以遠射入,我就試過 30碼左右射入林源三

 

上面講嘅其實都係遊戲基本概念,真正好玩嘅其實係自創角色培育呢 Part。喺「New Hero 模式」下,玩家要創建一位角色,經歷多場賽事後成長為可登錄於 Online Match 對戰角色。喺每場賽事開始前,玩家需要揀選唔同角色去培養好感,每達到一定數就可以學到該角色招式。例如個人極推薦技能「足球是朋友」(降低少衝刺盤球精神消耗)就要跟戴志偉學,學成之後就可以裝備於你嘅自創角色度,亦即係玩家可以喺《足小》所有角色身上揀選自己鍾意嘅技能去「偷師」,然後創一隻屬於自己嘅角色。

 

自創角色能力提升量取決於場上表現,即係要「獨食」啲,喺每場完結後會因應表現而提升數值

部份技能要有指定球員在場先可以發動,所以培育角色初期已經要諗定陣式

 

雖然可以培育自創角色,但佢都唔係無敵的,因為可以令角色成長嘅賽事只有十六場,打晒之後角色就要登錄,所以開頭 1 – 2 次玩都無乜可能練到自創角色好勁。因為習得技能係取決於好感度提升速度,要令速度提升就要「抽卡」,只要反覆抽到相同角色該卡就會升級,可大幅降低學技需求。最重要果樣係抽卡用 Game 錢抽就得,唔洗額外課金真係佛心到有啲驚(Bandai 啵……)。

 

最盡升到 LV5,要抽中好多次同一隻人先升到

 

去到呢個位一定有人話「咁我練多幾隻超勁角打 Online 咪贏晒囉」,事實係 Online Match 會有 Cost 限制。每位球員 Cost 值係視乎本身能力+技能強度而定,而 Cost 就係以頭 18 位球員總和決定,即係遊戲個平衡度係取決於 Cost 值,你鍾意前中場粒粒巨星,後場全部二打六都無問題。

 

玩家最多可登錄 20 位自創球員,不過 Online Match 最多只可以出 8 位,其他位置仍然需要原作球員

因為要抽卡嘅關係,而 Online Match 就係賺錢最快嘅途徑,建議就算未整好角都應該 Keep 住每日打幾場先

 

總結

自己不嬲都唔係足球 Game 同《足小》Fans,所以我純係抱住「隻 Game 好玩咪玩」嘅心態去開 Game,點知玩落就勁沉迷。雖然我唔係《足小》Fans,但老實講故事模式過場啲片同對話係幾好睇,有全語音又係加分的。另外因為本身鍾意玩競技遊戲,所以佢個培育 Mode 真係好啱我胃口,雖然打 Online 輸到飛起。

如果肯用心了解呢隻遊戲的話,佢絕對係一隻非常好玩嘅「足球格鬥遊戲」,但如果你想玩一隻《FIFA》式傳統足球遊戲,你就肯定覺得係伏 Game,真係視乎你用咩心態看待。最後建議大家可以的話就買 PS4版,比起 NS 版畫質更好,至於 Steam 版據聞已經有外掛,所以避得就避啦。

 

編輯部評分:9/10 (如果有得買賣球員的話就更完美)

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章