【遊戲介紹】末日凍土多人生存遊戲 《Scavengers》想贏唔一定要殺人

而家差唔多隻隻新 Game 都有大逃殺 Mode,不過當中大多數都係表達型式上轉變,例如加入喪屍元素、魔法大戰等等。不過今次介紹嘅遊戲就有啲唔同,黎緊即將推出嘅《Scavengers》本質上都類似大逃殺,但係佢更著重生存呢個元素,生存唔係講緊被其他玩家殺害,而係更巨大嘅環境因素「凍土」。

 

 

《Scavengers》由 Midwinter Entertainment 製作,採用第三身視點,係一款結合 PvP 同 PvE 嘅多人生存競技遊戲。背景講述未來因為月球被破壞,於是地球變成一片凍土,倖存嘅人類雖然已經前往太空站生活,但離開時都染上一種新型恐怖病毒。為咗醫病,負責監視佢地嘅 AI「Mother」 會定期發射太空艙落地球搜刮資源及補給品,玩家就係扮演呢班「拾荒者」,喺末日凍土上同其他人類、生物展開對抗。

 

 

玩家將以四人一組為單位,有坦、DPS 等職業之分,當然職業間都會有專屬技能。同一般大逃殺遊戲唔同,雖然同樣有 PvP 元素,但因位要兼顧角色嘅「溫飽值」,例如要生火取暖咁;角色亦有「肌餓感」,需要狩獵以維持生命,所以有時玩家需要共同努力先會得到最大效益。另外大逃殺遊戲常見嘅「縮圈」,呢隻遊戲入面會改為喺地圖周邊產生動態事件。例如會有狂風逼你向某方向前進;某地區會有肌餓異變生物暴走等等,隨時會有新事件出現,迫使你作出幫助定阻礙其他隊伍定嘅決定。

 

 

遊戲最終目標就係得到足夠嘅資源同埋生存落去,所以鎖定有威脅性嘅敵隊仍然有必要性,但唔一定要自己郁手。可以跟踪敵方玩家,引野生動物或者變異怪物送俾佢地;利用風暴偷偷地潛入庇護所搜刮等等,利用環境黎戰鬥係呢隻遊戲最大嘅特點。至於競技場嘅大小,完全取決於場內人數,根據官方所講去到幾百人都無問題,而且佢地內部早就測試過千人大逃殺。

 

 

《Scavengers》推出日期未定,對應平台為 PS4 / Xbox One / PC Steam。黎緊 PC Steam 版會喺 9 月 18 日做一波測試,有興趣嘅朋友可以上佢地官網度登記測試資格。

五木

五木 動漫電玩宅,極愛金田一系列,擅長動作及策略遊戲

追蹤

更多文章