【遊戲評測】劇情極有復仇者味 《Marvel’s Avengers》雖有瑕疵但誠意滿分之作

《Marvel’s Avengers》早排終於推出,不過坊間對佢嘅評價都幾二極。又因為成隻遊戲分為單機故事同線上多人合作遊玩二部份,要評價就必需分開二部分黎講。但總括黎講,《Marvel’s Avengers》絕對係至今做得最好嘅「復仇者聯盟」遊戲,而且喺遊戲入面各項細節都盡顯誠意,相信 Fans 們都會收貨。

 

 

《Marvel’s Avengers》由曾製作新版《Tomb Raider》系列嘅 Crystal Dynamics 及 Eidos Montreal、Nixxes Software、Crystal Northwest 團隊共同開發,採用第三身視點,屬動作冒險遊戲。喺正式開始之前,先講一講最被人所詬病嘅地方,就係遊戲版嘅復仇者聯盟成員同我地熟悉嘅電影版唔同,始終電影版本角色陪伴我哋多年,形象早已深入民心,但考慮到成本問題,我亦表示理解(除非你想成千蚊買隻普通版啦)。又因為遊戲大部份時間都淨係見到角色們嘅屎忽,基本上會自行腦補返電影版角色個樣落去,所以我覺得問題不大。

 

喺隻 Game 入面,自動腦補 Tony 做呢個樣

 

正路就要講一講畫面先,人物面相、版圖、動作等等都無可挑剔(話晒係整《Tomb Raider》班底),不過當畫面太多敵人時會有 Drop Frame 問題,多人遊玩時問題更為嚴重,希望透過更新檔獲得改善。另外本作並非開放世界,係類似《仁王》咁每個 Mission 獨立地圖的。

 

畫面真心唔錯,係偶有 Drop Frame 問題

 

先同大家單人劇情故事模式,故事以崇拜復仇者聯盟嘅幼年 Kamala Khan 為起點,見證住 A Day 慘劇發生、隊長之死、復仇者失蹤,及後出現「INHUMAN」(異人族)。然後聲稱要保護普通市民嘅組織「AIM」掘起,然後就被主角一行人發現係邪惡組織。故事框架雖然唔係話咩驚天地泣鬼神,但係當玩家睇住 Kamala Khan 努力地搵返每位復仇者,培養團隊間嘅感情,再慢慢變成 Ms Marvel,成個過程描寫細膩。當我玩到劇情接近一半時,發現真相並唔係咁簡單,團隊士氣低落到再次集結,成陣「復仇者」味出晒黎。

 

復仇者失蹤、INHUMAN 全部被消失

今次大奸角 MODOK,新造型幾正

去到最尾一小時勁有電影味道

 

劇本以外,製作團隊喺好多地方落咗心思。未出擊前角色可以係天空母艦中自由行動,有時復仇者隊員會喺自己房間出現,呢個時候會就可以入去佢地間房進行互動。例如喺雷神間房可以玩拎鎚;用隊長去 Tony 間房會同佢傾佢老豆(Howard Stark)嘅事等等,加上每位角色嘅對白係用心度過,尤其係 Tony 嘅「賤咀」演出超有電影版嘅味道,我都幾肯定製作團隊係 Avengers Fans 黎。

 

多個地方重現電影版彩蛋

重現電影彩蛋一幕,隊長拎得起少少支鎚

呢幅圖訊息量太高,請自行聯想

 

講完劇情就講少少戰鬥系統,同一般動作遊戲操作相似,主要攻擊都係分輕、重攻擊鍵、跳、擋格、必殺技。雖然基本操作大同小異,但係每位復仇者都係獨立設計,不論係拳腳判定、招式,特技都截然不同,而且唔係求期轉招式同 Skin 就話係新角色,係連系統都有所分別。例於 Iron Man 有地面戰嘅一般戰鬥模式;有滯空射擊模式;仲有高速追擊模式,會變到好似飛機 Game 咁玩,完全落足心機去整,唔似隻《Marvel Ultimate Alliance 3》咁,差唔多隻隻角色招式都差唔多,高下立見。

 

Iron man 同雷神都有飛機 Mode

同 Beta 唔同,技能變成三頁,可針對自己戰鬥風格專精專屬技能,例如我隊長就主力玩遠攻掉盾

招式還原度高,不過打擊感就麻麻地,黑寡婦就特別嚴重,打人勁無 Feel

敵人有擊倒、浮空、暈眩等狀態,暈眩值滿晒仲可以使出終結技,施展期間無敵兼回血,盡量令敵人出現以上狀態減少被圍危機。加上遊戲有一定難度,絕對唔係亂劈無雙 Game 黎

 

除咗 Iron Man 之外,每個角色之間嘅差異可以話係非常明顯。例如雷神可以儲力放電同掉雷神之鎚,叫返個鎚時仲會有攻擊判定,又可以放個鎚喺敵人身上令佢無法動彈;黑寡婦就可以限時內隱身,而且連附近嘅隊友都會享有呢個 Buff;Hulk 只要一直 Keep 住有怒氣的話就接近無敵。另外地圖上收藏寶物嘅地方有時要破壞或者用電腦鎖鎖住,前者只有 Ms Marvel、Hulk 同雷神先可以打破(HulkBuster 都得),後者就要靠 Iron man 或黑寡婦 Hack 入去,呢個設定亦都符合返各成員特長,值得一讚。

 

呢個 Icon 開關只有 Iron man 或黑寡婦先開到

有巨型敵人,呢隻野勁似《MHXX》隻螳螂

 

到講多人模式啦,呢個模式主要係玩「刷裝」。遊戲中角色強度以「威力」定義,「威力」就等於角色身上嘅裝備強度總和,相信有玩過《Destiny》嘅玩家非常熟悉。雖然角色可以透過刷裝提升「威力」,但係敵人強度亦會隨你威力上升而調整,所以「威力」可以視之為入場條件,即係同一關 Easy 要 20 威力;Normal 要 30 威力咁樣。現時單件裝備威力上限為 140,所以裝備未夠 140 前都係過渡性用,去到頂先開始砌裝(不過角色最盡可以谷到去 150)。各類裝備都有附加能力值,有加近戰爆擊、有附加屬性的,不過暫時種類唔算多,相信之後會有所增加。

 

未夠 140 威力嘅裝全部都係過渡性,唔好理咩色,只要係最高威力就裝上身,用完就拆無需留戀

 

不過現時多人模式最大問題唔係刷裝,而係任務類型過度重覆,不外乎都係最尾打王又或者開金庫,最弊嘅係關卡地圖好多都分別不大,玩幾次就會浮現「又係呢個 Map」嘅想法。相比《Destiny》每個地區地型明顯不同,就算同一星球每個分區都好有印象,《Marvel’s Avengers》喺呢方面就明顯比下去了。

 

同一地區差唔多個個 Map 都一樣

 

早前有人喺 PC 版破解內部文件,估算黎緊會更新追加嘅人物,基本上電影出過嘅角色都會有,會以一個月為單位逐次更新。官方公佈咗嘅有女鷹眼、男鷹眼、蜘蛛俠(PS4限定)、蟻人、黑豹,而且並非追加一隻角就算,係會有埋相關故事玩的,可見 SE 有長期營運遊戲嘅打算。所以個人認為現時評論多人模式言之尚早,加上外國論壇玩家都有就以上問題討論,官方一定知道問題所在,唔改嘅話黎緊邊個會買 DLC 呢?

 

現時版本有樣野好大鑊,就係勁多 Bug,即使我玩嘅係 PS4 版本,Load 唔到 Game、Call 咗 HulkBuster 無得用、人物卡住郁唔到等等,真係五花百門,據聞 PC 版情況更嚴重,希望快啲 Fix

超原始版本 Iron man 甲,係好有誠意嘅

 

總結:

以 Marvel Fans 黎講,劇情我非常收貨,雖然尾段有少少趕收工,但係將「INHUMAN」元素融入呢點我覺得唔錯,而且結局更加明確地話你聽故事未完。考慮到官方有長期營運打算,隨時會好似《Destiny》咁有改版延續故事,而且綜觀外國玩家對劇情一致好評,令人更加期待新故事嘅來臨,淨係呢點已經構成入坑嘅原因。

 

Taskmaster 好窮,件衫穿窿

 

多人模式要改善地方唔少,Load Game 時間耐、任務類型同地圖少絕對係致命傷。不過隻 Game 出得個零星期,仲處於摸索期,我就好有信心將來一定有所改善,話晒 Crystal Dynamics《Tomb Raider》都越做越好啦,今次咁大個 IP 無理由想佢死嘅,所以都係推薦大家落坑。

都係果句,《Marvel’s Avengers》絕對係至今做得最好嘅「復仇者聯盟」遊戲。

 

編輯部評分:8/10 (更新要快,最緊要 Fix 晒啲 Bug 先)

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章