【編輯部專題】微軟真正殺著並唔係機價 係三年唔洗錢買遊戲呢招

城中熱話當然係年尾二大主機之戰,雙方喺早排出晒機價、推出日期等資訊,PS5 預定更再現香港人團結本色,齊齊隊冧 Sony 官網 Server,成為城中熱話。不過今次講嘅係近年處於弱勢嘅 Xbox 陣型,其實佢地幾年前已經推出一個屈機服務「Xbox Game Pass」,有幾屈機?接近三年唔洗錢買 Game 夠唔夠屈?

 

 

早於 2017 年,微軟推出「Xbox Game Pass」服務,不過由於香港區缺乏宣傳,所以一直都無乜人知係乜黎,直到 2018 年「Xbox Game Pass」對應埋 PC 先多啲人知,但係家用機玩家絕大部份直頭聽都未聽過呢樣野。講咗咁多,咁到底呢個服務係咩黎呢,簡單講你可以當佢係超級遊戲庫。

 

 

只要擁有「Xbox Game Pass」,你就可以無限制使用微軟提供嘅遊戲庫,而呢個遊戲庫每個月都會新增多隻遊戲入去,最重要嘅係加入嘅遊戲並唔係幾年前又或者無人要啲倉底貨,基本上該月新作多數都有份,好似《Wasteland 3》、《Age of Empires III: Definitive Edition》呢啲大作都係一推出市面已經喺「XGP」有得玩。最正嘅係 Xbox Games Showcase 上早已宣佈,所有講過嘅作品都會喺「XGP」上玩到,重點大作如《Medium》、《Scron》、《Fable》等作品全部包括在內!

 

重點大作如《Medium》、《Scron》、《Fable》等作品全部都會喺「Xbox Game Pass」度玩到

 

我哋就「Xbox Game Pass」內容向微軟方查詢過,佢地嘅遊戲庫每月更新,會加新遊戲之餘,亦會將部份遊戲下架,不過我地查過下架嘅遊戲多數都係比較少小眾類遊戲,唔太需要擔心。至於微軟自家出品通常都常駐,例如《Gear》系列、《Sea of Thieves》等等。

 

《Gear》系列、《Sea of Thieves》呢類微軟自家出品通常都常駐「XGP」

 

可能你會話,「Xbox Game Pass」幾抵都唔關我事啦,都無乜 Game,又無日系 Game。呢個問題你早四年講可能都係,其實近年絕大部份遊戲都係二大平台都有,大作如《Monster Hunter World》、《隻狼》、《BIOHAZARD RE:2 & 3》、《Red Dead Redemption 2》、《Cyberpunk 2077》、《刺客教條:維京紀元》等等都係有 Xbox One 版本,買多部 Xbox Series X/S 加個「XGP」,齋玩大作條數都有得計,絕對抵玩。

 

《Monster Hunter World》有 Xbox One 版本,原來真係唔太多人知

 

根據經驗,微軟自家工作室出品多數都係一出就會直落「XGP」,所以工作室嘅質量係非常之重要,加上早前微軟收購 Bethesda,令微軟旗下工作由 17 間擴展至 23 間(詳情請參閱遊戲情報科)。不得不提嘅係一眾工作室入面,有備受玩家喜愛嘅「黑曜石娛樂 」,又因為佢係曾製作大受歡迎嘅《Fallout: New Vegas》,極有可能會將《Fallout》系列俾返黑曜石做,到時真係滿足晒成班 Fans 心願。

 

 

除咗上面品質保證嘅「黑曜石娛樂 」,另一間工作室 Ninja Theory 曾製作得獎作品《 Hellblade: Senua’s Sacrifice 》,喺早二年已經被微軟收購,黎緊第二集自然備受注目,同樣會於 XSX / XSS 推出。仲有一間工作室 The Initiative,成員來自 Rockstar、頑皮狗、SIE 聖塔莫尼卡等,雖然仲未有作品推出,不過外間已經評價佢地做「4A 級工作室」備受期待。

 

《Senua’s Saga: Hellblade II》

 

工作室強大,咁日系遊戲陣容又表現如何?強大如《人中之龍 7》、《Kingdom Hearts 3》、《DRAGON QUEST XI S 勇者鬥惡龍 11S》喺 Xbox 都搵到,但就無《Persona》系列、《軌跡》,的確係唔算強,但未至於完全無。不過講到日系遊戲,其實呢二部機都唔係強項,因為最多日系遊戲果部機叫 Nintendo Switch…….。

 

講咁多,咁「XGP」其實幾錢呢?「XGP」現時有三種:

  • 第一種就係「Xbox Game Pass」,只限 Xbox 用家使用,單買每個月 HKD $79,唔太抵買
  • 第二種就係「Xbox Game Pass PC」,包含 EA Play(即係包埋 EA 熱門 Game 任玩,詳情),只限 PC 用家使用,首月 HKD $10,之後每個月 HKD $79,PC 用家都算抵買
  • 第三種就係「Xbox Game Pass ULTIMATE」,包含 EA Play(即係包埋 EA 熱門 Game 任玩,詳情),包含金會員資格(你當係 Xbox 版 PSN+),同時支援 Xbox 及 PC 用家,首月 HKD $10,之後每個月 HK$119,但最多可以一次過買 36 個月,亦即係只需要買三年金會員 + HKD $10 就可以享有三年「Xbox Game Pass ULTIMATE」資格,超級抵買。

 

補充一點,「Xbox Game Pass ULTIMATE」資格係由你買果刻開始計,會自動將資格綁定至閣下現有嘅金會員度。所以正確玩法應該係先買盡 36 個月金會員,再用 $10 蚊買「Xbox Game Pass ULTIMATE」兌換,咁就最抵玩。要注意如果本身已經有金會員資格,「Xbox Game Pass ULTIMATE」係會由你買果刻開始計,所以買前務必確保自己最少有 36 個月金會員資格。(記得 11 月先買,而家買蝕一個月)

 

例子:本身有一年金會員,買「Xbox Game Pass ULTIMATE」後只會有一年「Xbox Game Pass ULTIMATE」資格;本身有一年金會員,先續購二年金會員,再購買「Xbox Game Pass ULTIMATE」,則三年都會擁有資格。

 

新世代主機 Xbox Series X / S 日前已經正式展開預購,不過我地編輯部都唔係人人搶到,台灣果邊唔洗 1 分鐘就賣晒。考慮到 11 月出《Cyberpunk 2077》,大家都想用新機玩,PS5 又唔知炒到幾時,何不雙修?

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章