【遊戲評測】唉阿DLLM 《Project Cars 3》極適合新手入門的賽車遊戲

賽車 Game 不嬲都有班捧場客,雖然我就比較鍾意玩《Mario Kart》呢類非正式賽車遊戲,但係《The Crew》、《Forza Horizon》呢類擬真賽車遊戲有時都會玩下,但當然唔係沉迷果隻。今次玩嘅係早前推出嘅《Project CARS 3》,根據官方所講呢集係成個系列入面最易入門嘅作品,試過之後發現佢嘅輔助功能的確做得幾好,係一款適合新手及高手嘅賽車遊戲。

 

 

《Project CARS 3》由 Slightly Mad Studios 開發,係一款擬真賽車遊戲。基本上只要係「擬真賽車遊戲」,都極建議玩家使用軚盤+腳踏套裝黎玩,因為比較起用手制,感覺係差極遠,學名叫「無 Feel」,不過《Project CARS 3》喺增強手制操控感呢 Part 明顯有落功夫,但比起軚盤+腳踏仍然有頗遠距離。

 

最平嘅軚盤+腳踏都係900蚊就有

 

正常都係講一講畫面先,《Project CARS 3》畫面做得幾唔錯,喺全平台都有 60fps。天氣變化表現自然,特別係落雨時果條濕滑賽道配上粗心大意嘅司機,跣呔感覺更為明顯。另外音效製作喺大部份時間都恰到好處,引擎聲、輪胎聲、雨點聲等聲效做得幾真實,不過同碰撞時聲效就比較差少少。

 

呢個係落完雨,地下仲有少少濕嘅情況,齋睇畫面都 Feel 到濕度

 

遊戲操控性不俗,所以高速過彎時技巧需求頗高,要注重車身重心,過彎後盡快「擺直」加速先快,不過講就簡單實際要做就難。開發團隊理解到一般玩家未必有咁高技巧,所以加入超強輔助功能協助新手一步一步掌握技巧。只要將輔助功能全部開啟,AI 會自動計算過彎前要幾遠距離減速,自動計算入彎角度,玩家只需要控制油門同方向就得,即使係新手都可以體驗到賽車嘅快感。

輔助功能強大,但同時對玩家嘅限制非常多,例如想剷上草地走捷徑,Sorry 係唔得嘅。當然隨住玩家慢慢掌握操控方法,可以逐部減少輔助功能項目,就可以做各種非正規行為,系統亦會增加玩家得到嘅經驗值,視之為對玩家技術嘅肯定都唔錯嘅。

 

輔助功能超強大

多達八個視點選擇

 

《Project CARS 3》加入生涯模式,由最低級車手出戰各類型比賽,完成一定數量就可以開啟下一級別賽事。遊戲區分賽事水平嘅方法簡單講就係車嘅性能,喺初始 E 級升上 D 級後,即使用返同一架車,但因為改裝零件更強,成架車脫胎換骨,有一種「上個級別係俾細路仔玩」嘅 Feel。

 

完成一定數量比賽目標就可以開啟下一級別賽事,過唔到的話用錢開都得

突圍賽 – 限定時間內撞爛路上嘅分牌,以獲得最高分為目標,呢個形式都幾好玩

 

講到改裝,本作可作改裝嘅項目非常多,對性能產生影響嘅細部零件多到嘔,每件零件都會影響xx xx xx xx 四個參數,但又唔代表可以乜都改到最強,因為改裝零件後會增加車嘅「Cost」,超過該級別限制的話就不能使用該車出賽。所以玩家要喺限制內針對自己駕駛習慣,Tune 一個最適合自己嘅改裝,或者買過部新車……..。

 

改得太勁超過該級數值就會導致該車不能出賽

 

除咗性能改裝,車嘅改觀亦有非常多嘅選項調整。最簡單嘅顏色、拉花,細到車軨牌子、大少,車呔牌子等等全部都有得改,算係咁。當然如果容許玩家上載自己設計圖案作改裝就更好,類似嘅功能《GT Sport》早就有,整架香港的士款跑 Track 你話幾型。

 

外觀調整項目都算多

車手代表國家連香港同台灣都有

 

總結:

《Project CARS 3》強大輔助功能的確好幫到新手,可以話係最佳擬真賽車入門作品,不過中高手可能會嫌佢唔夠難。Online 對戰部份亦都做得恰到好處,Lag 機情況則還好,可接受範圍之內。

Slightly Mad Studios 本身就只做競速類遊戲,經驗極之豐富。雖然早前推出嘅《Fast & Furious Crossroads》(詳見評測),令人「大開眼界」,但《Project CARS 3》交足功課,成功挽回我對佢地嘅信心,深深令人感受到「認真」同「Hea 做」嘅分別,人生又上一課,幾好。

《Project CARS 3》已經推出,對應平台 PS4 / Xbox One / PC。

 

編輯部評分:7/10 (不過不失,但對新手的確友善所以有加分)

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章