喺網絡上流傳左好一段時間嘅一個消息，話 LEGO 官方會喺 2021 年年頭會出架新嘅 LEGO Technic Porsche。後來發展到有埋疑似官方嘅包裝盒圖都見埋，不過就唔係流傳嘅 LEGO Technic，而係將 LEGO Mindstorms 同 Porsche 結合，成為一架全電腦程式化嘅 Porsche 911！近日仲見到有網友 Cap 圖話官方 Instagram 流出相關嘅廣告圖。個個講到言之鑿鑿嘅時候，比我搵到個叫 lego-lab.com 嘅網站，有啲幾得意嘅發現！

呢個「不知名」嘅 LEGO Lab 網站竟然有住呢架被稱為 LEGO MINDSTORMS Porsche 嘅東西，仲話可以WiFi或者藍牙連接、超聲波測量距離、全自動駕駛等等，睇落已經覺得非常吸引！不過放大網頁下方嘅 Box Art 圖，你會發現點解會係「515153」呢個少有嘅 6 個數位編號？外觀同 42096 Porsche 911 RSR 一模一樣但件數得 819 件？

然而如果你撳左入去「i want it!」之後，會跳左去 LEGO MINDSTORMS Porsche 產品意見收集嘅活動網站，而內容講明左件產品會喺不久將來先會實現。不過特別提醒大家，記得記得記得個人資料係非常重要，所以喺呢啲「不知名」網站就唔好亂咁填寫啊！

但最有趣嘅係呢個網頁有晒 LEGO 官方嘅註冊商標，而且「 Privacy Policy」嘅連結又去返 LEGO.com 隱私政策版面，如果係個假網站， LEGO 官方就最好快啲澄清而免得大家個人資料外洩。反之如果個網站突然消失左的話，事情就似乎會變得好有趣。

官方一日未正式放上貨架發售，件產品都可以突然間回收，所以大家當故仔聽下算數啦。