2018 年時有一隻極為出色的互動選項歷險作品《Detroit: Become Human》面世，遊戲以故事為主，動作為次，係一隻非常「靜態」類型嘅作品。假如你對於呢種互動選項類型嘅遊戲感到興趣，今次介紹呢隻《Tell Me Why》可能都會啱你口味。
《Tell Me Why》已於 2020 年 8 月 27 日推出，對應平台為 Xbox 以及 Steam（我使用 Xbox Game Pass 遊玩），遊戲由法國工作室 Dontnod Entertainment 開發，工作室曾經製作《Life Is Strange》系列、《Vampyr》以及《Twin Mirror》等作品。
《Tell Me Why》嘅故事大綱非常簡單易明。一對孖生姐妹，由母親一手照顧長大，生活在阿拉斯卡一個小鎮裡面。及至十歲時，因為母親「離世」，姐妹二人各自交畀唔同嘅社福機構照顧。
直至遊戲開始之時，兩人團聚，姐姐 Ollie 正準備進行變性手術，因此外貌已變成小伙子模樣，亦已改名為 Tyler；而妹妹 Alyson 亦已成長，並打算搬到較大的城市去生活。於是，二人打算把童年居住的舊屋出售。
然而，在收拾細軟時，二人卻慢慢發現意想不到嘅真相：母親嘅死因，母親嘅過去；小鎮上面，人人友善，卻似各自守有秘密及各種私心。到底邊個講緊真話，邊個心懷鬼胎，故事走向又會如何，呢一度就全由玩家去決定。
《Tell Me Why》嘅結局唔止一個，玩家於故事中會交替操作 Alyson 與 Tyler，而你嘅決定、選項，都會影響結局嘅走向。
故事裡面包括左家暴、PTSD（創傷後患症）、教會信徒偽善、性少眾於身份認同上面嘅掙扎等等題材。遊戲並無一個泣鬼神驚天地嘅劇本，只係每個轉折位都令人頗為意外；同時，故事角色嘅選項、以及感情表達都非常真實，亦有唔少解謎元素，因此推出後獲得大量好評，假如你都鍾意劇情向文本遊戲，呢隻《Tell Me Why》相信唔會令你失望。
勇敢面對真相未必係大團圓，但係，逃避現實扮無事發生，又是否最佳選擇？為左取得唔同結局，我已將《Tell Me Why》兩周目，遊玩之時，亦有部份劇情令到心中戚然。比較可惜嘅係，《Tell Me Why》暫時於兩個平台上並無中文版本，不過英文用字亦甚為簡單易明，相信難唔倒我地一眾精明嘅玩家！
《Tell Me Why》已經推出，對應平台為 Xbox 以及 Steam，對應 Xbox Game Pass。
另外 PC 版本如下：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。