7 年前曾經推出一隻地城尋寶探險遊戲《Spelunky》，類 Rouge 元素加上隨機生成關卡，令遊戲備受玩家喜愛，可惜嘅係香港無乜人識。較早前終於推出續集《Spelunky 2》，延續上集玩法之餘更加入多人遊玩等新元素，絕對係近期出色嘅小品遊戲。
《Spelunky 2》由獨立開發團隊 Mossmouth 製作，係一款橫向 roguelike 動作遊戲，最大支援四人連線合作。遊戲表面上同一般橫向動作類似，都係一邊探索搵寶物、救援被困嘅友軍，然後尋找前往下一關嘅通道，操作方式亦只有基本移動、跳躍、揮鞭攻擊以及二種消耗道具，可以話係非常簡單。但係遊戲設計上充滿住滿滿嘅惡意，各種極麻煩嘅敵人例如彈黎彈去嘅穿山甲、突然出現嘅地鼠等等。
敵人麻煩，關卡中嘅陷阱更煩。唔知邊度射出黎嘅箭、地上突然出現嘅尖刺、甚至係自己掉出去嘅石頭、空箱都會反彈整死自己，就算理論上最安全嘅商店，唔俾錢拎走貨品的話，老闆會喺唔知邊度揸住霰彈槍衝出黎殺你（不過打死佢有得執埋佢支槍）。加上有 Friendly Fire，隊友出鞭會打暈埋你、隊友掉炸彈企太近又會炸死埋你，基本上人多混亂就會有隊友做錯野整死你，真正係越多人玩越難玩。
《Spelunky 2》已經推出，對應平台為 PS4 及 PC Steam，如果想玩 PS4 版嘅朋友需要去 US 或 EU PS Store 先會見到，敬請留意。
VJGamer總編，細細個已經蒲機舖，機齡甚深，熱愛電玩文化。