獨立遊戲工作室 SadSquare Studio 受到小島秀夫《P.T.》啟發，開發第一人稱心靈恐怖遊戲《Visage（面容）》，係一隻解謎脫出遊戲。《Visage》於 2018 年 10 月時已開始於 Steam 平台上開始「優先體驗」，獲得壓倒性的好評。工作室宣佈遊戲將於 2020 年 10 月 30 日正式上架推出，對應平台為 Steam、PS4（歐美版）及 Xbox One。

故事舞台為一間曾發生過各式悲劇慘案嘅廢屋。玩家必須於屋中探索，憑借各種物事，去理解廢屋過去到底發生過乜野故事；但係，同一時間，屋內殘留住各種怨氣，以及盤踞此地嘅死靈都會向玩家作出攻擊。

《Visage》同《P.T.》一樣，玩家係沒有任何攻擊／反擊能力的，你能夠做嘅就係逃走，或者嘗試避開佢地去進行探索。

遊戲裡面仲有「SAN 值」設定，玩家如果長期處於黑暗之中、或者過度受到驚嚇，都會失去理性及正氣值而 Game Over；所以玩家仲需要尋找燈光（火爐、燭光等）去吸取光芒以保持 SAN 值。

早於遊戲「優先體驗」開放期間，唔少外國專門攻略恐怖 Game 嘅網站例如 The Horror Syndicate 已經對《Visage》作出極高評價，例如係被死靈追擊嘅無助感、探索期間於屋內會產生的各種微妙變化與音效，都非常成功地增加遊戲嘅恐怖感。假如你都係恐怖遊戲嘅愛好者，《Visage》或者係你今年萬聖節嘅應節選擇！