【遊戲新聞】PS5 缺貨成商機 英國公司囤機過千台炒賣

PS5 已經推出市面,但因為供貨量少導致全球市面一機難求,就算有人放出黎都一定係炒價,有炒價就即係有「商機」,唔少商人都想藉住今次機會大賺一筆。根據外媒 Business Insider 報導,英國一間公司囤機過千台,再以高於建議零售價方式賣出。

 

 

根據外媒 Business Insider 報導,CrepChiefNotify 呢間由 12 人組成嘅公司,由九月 Sony 啱啱進行預訂時已經訂咗接近一千台 PS5,之後佢地公司嘅會員大約購買咗 2,472 台 PS5,總數大約近 3,500 台。

CrepChiefNotify 唔係單純以炒價去銷售 PS5,而係以更聰明及長線嘅方式 – 付費會員制。要使用佢地嘅服務就必需成為付費會員,收費由 29.99 英鎊至 399.99 英鎊。付費會員可以使用各種服務,服務主要係「保證」會員可以買到備受追捧嘅新產品、或者有可觀利潤嘅轉售產品,通常都係潮流物品為主,例如係波鞋、名牌限量產品等等。

 

 

由於武漢肺炎令到大量英國遊戲零售店關閉,早喺微軟同 Sony 進行網上預購時,佢地已經準備好大量嘅自動程式進行「搶購」,確保每位付費會員都會最少擁有一台 PS5、XSX。除咗利用程式,佢地仲有專屬嘅渠道得知幾時邊度會返貨,CrepChiefNotify 嘅其中一位經理接受訪問時就話過「喺消息發佈前佢地就已經知道要去邊」。

 

PS5 主機極度缺貨,全球想正價入手難如登天

 

面對呢啲專業搶貨公司,普遍玩家要搶贏佢哋機會微乎其微,類似情況喺香港亦有發生,例如近日就有店舖以高價收購 PS5 囤貨,令一般玩家更難買到新機。 其實要遏止炒風,最簡單嘅就係供貨量足夠,另外亦可以採取各種政策幫助,例如原有客戶優先(PSN+、Xbox Live Gold)購買。一方面可以喺某程度上確保真用家購買,另一方面增加非用家購買難度。起碼唔洗好似而家咁,想玩嘅無機,炒貨或者唔打機嘅人唔插電影相 Showoff 自己有機,惹起公憤。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章