相信唔少玩家近日已全心全靈投入於《Cyberpunk 2077》嘅夜城當中，而隨住遊戲正式上架，工作室 CD Projekt Red 方面亦表示，首批免費 DLC 將會於 2021 年初陸續推出，並向玩家預告，DLC 將會為大家提供唔同嘅「Cool Stuff」，相信可能係武器或道具方面嘅更新。

早前亦提過工作室將會以同廠作品《The Witcher 3》作為藍本，會推出份量同等嘅付費故事擴展 DLC，希望令到玩家可以對夜城有更深度理解，而劇本亦會有大量令玩家感到掙扎嘅人性選項，相信值得各位期待。

於 12 月 10 日推出嘅大熱作品《Cyberpunk 2077》於上架後三小時，於 Steam 平台上同時登入遊戲嘅玩家已經火速超過一百萬人，預計數字於黎緊周末會進一步突破。事實上 CDPR 同廠作品《The Witcher 3》於 2015 年 5 月 18 日喺平台推出當日，Steam 上同時登入數為 103,329 人，所以今次《Cyberpunk 2077》嘅龐大數字亦都令到工作室非常雀躍。

工作室預計 2021 年會為遊戲「多人聯機」機能作進一步公佈，有興趣嘅玩家請繼續緊貼留意消息。

《Cyberpunk 2077》已經推出，對應平台為 PS4｜5、Xbox One｜Series X｜S、PC、Stadia。