【遊戲新聞】超抵玩多人同遊塔防 《Ultimate Zombie Defense》防禦工事結合動作射擊殺喪屍

由《魔獸爭霸 3》年代已經好迷塔防類遊戲,不過近年就越黎越少呢類遊戲推出(手遊例外),最近就有隻推出唔夠一個月就得到「極度好評」嘅塔防遊戲《Ultimate Zombie Defense》,結合起防禦工事同動作射擊元素,玩落都幾過癮。

 

 

《Ultimate Zombie Defense》劇情講述位於歐洲一個爆發喪屍病毒嘅城市,身為軍隊一份子嘅玩家被派到呢個城市入面,搵出病毒源頭並將之摧毀。玩法就同一般塔防遊戲一樣,主要玩法都係要抵禦一波波來襲嘅喪屍,透過擊殺喪屍獲取金錢再用呢啲錢黎起防禦工事或這買武器,以生存到最後為目標。

 

 

 

喪屍來襲前玩家要先建設基地防禦工事,有擋路用嘅混凝土牆、電網、沙包,亦有自動炮塔、地雷等可供設置,當然呢啲防禦工事亦有得升級。不過搞笑地啲喪屍唔似一般塔防咁會走去故意留空嘅道路,而係會拆就近嘅物件又或者追人先,唔知係未 Set 好 AI 定刻意設定到咁,非常獨特。至於登場喪屍除咗有一 Hit 死雜兵 LV 果款,仲有識吐痰遠攻、自爆仔、巨型 Boss 等特殊喪屍,玩落都幾緊張。

 

 

 

除咗起防禦工事,玩家亦會控制其中一名角色於戰場上游走。現時可供選擇職業分別有重武裝士兵、醫療兵、專家以及工程師,每個職業都有相應技能樹,只要用該職業進行遊戲就會得到經驗值升級,之後就可以點技能,根據官方介紹最後會增加可用職業至八個。

另外玩家仲可以喺武器商店中購買手槍、步槍、重武器三類型槍械,但玩家一旦死亡,所購買嘅槍械亦會隨之失去,需要小心行事。

 

 

現時遊戲提供城市、大橋、購物中心三個地圖,雖然現時防禦工事及武器種類唔算多,不過官方就講明會持續更新,加上現時特價只需要 HKD $21.00,試下無壞。《Ultimate Zombie Defense》最大支援四人同遊,現時只對應 PC Steam。

五木

動漫電玩宅,極愛金田一系列,擅長動作及策略遊戲

追蹤

更多文章