【遊戲介紹】紙都可以好好玩 《Scrap Story: The Paper Prelude》即將推出的免費「紙」角色扮演遊戲

之前推出嘅《Paper Mario: The Origami King》令大家驚覺原來用「紙」嘅方式玩遊戲可以好過癮,黎緊又有一隻以「紙」做主題嘅遊戲《Scrap Story: The Paper Prelude》,遊戲同樣活用各種「紙」嘅特性,仲要免費有得玩,真係 Download 咗先算啦!

 

 

《Scrap Story: The Paper Prelude》由獨立遊戲開發商 ScrapPaperDev 製作,屬於角色扮演遊戲。故事講述紙女孩喺森林中嘅小屋醒來後,見到哥哥留低嘅紙條,上面寫住佢出發前往尋寶之旅,因為好快就返所以唔洗搵佢。但係每個人都知道有強大怪物守護住寶藏,於是紙女孩就踏上尋找哥哥嘅旅途。旅程中會到達唔同嘅村莊,可以幫村民完成任務又或者贈送禮物加深交流,當中更有會與你結伴上路嘅朋友。

 

 

遊戲特點在於活用各種紙嘅特性,例如紙女孩可以將自己捲曲變成一碌,然後滾動進行快速移動,又可以喺空中將自己攤平再變成紙飛機,藉此進行長距離空中移動,基本上旅途上好多難題都需要用紙嘅特性去解決,玩家要多動腦筋。另外地上嘅植被、建築物、敵人、戰鬥場景等等都係用紙做成,整體感覺好似睇緊圖畫故事書咁,非常溫馨。

 

 

角色扮演遊戲又點少得戰鬥,喺呢隻遊戲入面採用一種叫做「機會時間命令」系統。除咗戰鬥,本作仲有耕種、烹飪、秘密基地等等元素,老實講以免費遊戲黎講算係幾豐富,而主線劇情亦會有 6-8 小時長度。《Scrap Story: The Paper Prelude》預計於 2021 年春季上市,將會於 itch.io 發佈,稍後亦會有 Steam 版本。另外預計今年秋季會發表埋 Extra 更新檔,提供額外的章節及附帶任務,同樣係免費型式公開。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章