【遊戲介紹】捉姦講求鬥智鬥力 《Don’t Cheat On Me》丈夫vs妻子&奸夫三人對戰遊戲

「呢度啲女全部都我叫嘅!」呢個捉姦情節相信大家都耳熟能詳,你有無諗過捉姦都有得出 Game 呢?由 A Normal Monkey Studios 開發嘅捉姦遊戲《Don’t Cheat On Me》早前已經喺 PC 上推出,一齊體驗下呢隻三人對戰遊戲啦!

 

 

《Don’t Cheat On Me》係一款多人動作對戰遊戲,採用第一身視點。遊戲中三位玩家各自扮演丈夫、妻子同埋隔離屋間奸夫任一角色,但係妻子同奸夫係屬於同隊,亦即係話呢隻遊戲係玩丈夫 vs 妻子 & 奸夫嘅 1 vs 2 遊戲。至於遊戲玩法就類似《Dead by Daylight》,即係「玩捉」咁上下,所以地圖上有極多地方供玩家躲藏。

 

 

雖然主軸係「玩捉」,但係開發團隊為遊戲添加各種元素,其中一點就係玩家所扮演嘅三位角色各自有不同目標及能力。例如扮演丈夫嘅玩家目標係尋找妻子出軌證據以及捉住奸夫,角色特性係擁有強大嘅個人能力及武器,而且戴綠帽後仲會強化自身能力值;而妻子同奸夫嘅目標都係要逃走,妻子可以使用各種道具,而奸夫就有嘲諷技能,同時仲可以喺地圖中搜索盜取丈夫嘅資產,藉此尋找逃走機會。

 

 

前面講到妻子可使用各種道具,呢啲道具能力其實都幾有趣,例如音樂播放器使用後會令人情不自禁跳舞;臭襪會臭到人頂唔順企定定等等。不過遊戲現時評價「褒貶不一」,主要係平衡度問題,去到後期經常變成正面對決,同本身要「偷偷摸摸」嘅感覺背道而弛,希望黎緊會有改善。

 

 

《Don’t Cheat On Me》已經推出,對應平台為 PC Steam,對應繁體中文。

五木

五木 動漫電玩宅,極愛金田一系列,擅長動作及策略遊戲

追蹤

更多文章