【遊戲介紹】開放世界大型喪屍生存遊戲 《The Day Before》極靚畫面末世求存

喪屍末日遊戲都出得幾多幾密,但係如果場景、設定極似《Division》再加埋係 MMO 又點睇?《The Day Before》就係一隻滿足晒以上條件嘅新遊戲,雖然早幾日先公佈,但係隔幾個月就有得玩,係時候搵定隊友啦!

 

 

《The Day Before》由 Fnatastic 開發,係一款開放世界多人大型線上生存遊戲,採用第三身視點。遊戲舞台位於美國近紐約地區,因為病毒大流行爆發,感染者變得渴求人肉,倖存者亦互相殘殺爭奪物資,而我地所扮演嘅角色因為喺病毒爆發前一晚處於昏迷狀態避過一劫,醒來之後發現已經唔係佢所熟悉嘅世界,為咗生存決定同其他玩家合作或者合力廝殺。

 

 

喺展示嘅影片中見到畫面表現質素極高,絕對不輸 3A 大作。玩家亦可以調查摩天大樓、房屋、廢棄嘅車輛等等尋找資源,當然喺搜索過程要盡量保持安靜,因為聲響除咗會引來敵對倖存者、其他玩家,仲有機會引來大量喪屍。另外,喺畫面左下角我地見到有三個 Icon,分別係係飢餓度、口渴度以及體溫值,玩家要時刻留意呢三個生存指標,將佢地控制喺安全區否則將面臨死亡。

 

 

除咗喺城市中探索,玩家仲可以駕駛車輛前往更遠嘅地區探索,有機會搵到倖存者聚集地,進行交易買賣物品,亦可以喺呢啲地區安全地與其他玩家交流,又或者幫倖存者做任務爭取更多幫助。

 

 

《The Day Before》已登上 PC Steam 商店頁面,預計推出日期為 2021 年 4 月至 6 月,對應繁體中文。

 

五木

動漫電玩宅,極愛金田一系列,擅長動作及策略遊戲

追蹤

更多文章