【遊戲介紹】表面上係炸雞店 《Definitely Not Fried Chicken》實際上係毒品王國的經營遊戲

大家都鍾意食炸雞,理論上經營炸雞店模擬遊戲都會受歡迎,如果再加埋製毒元素應該更加過癮。今年將會推出一隻表面係經營炸雞店,實際上係做緊毒品王國嘅經營遊戲《Definitely Not Fried Chicken》,真係諗起都覺得……肚餓。

 

 

《Definitely Not Fried Chicken》由英國獨立團隊 Dope Games 開發,屬策略模擬經營遊戲。玩法同一般經營遊戲接近,都係可以由玩家自行設計店舖、購置炊具及廚房設備、騁請員工等等(可以自己養埋雞),再推出炸雞、薯條等食物吸引客人賺取口碑,並以擴張業務為目標。不過以上只係炸雞店果部份,因為大家賺錢主力嘅渠道係後面嘅毒品製造所,種植、製作及販賣各種毒品。

 

 

玩家可因應毒品種類設計生產線及安裝相應嘅設備,例如水耕種植套奘適用於大麻,亦有製作可卡因、冰毒嘅藥品研發設備。有毒品之後仲要建立銷售管道,有時仲會有危險嘅客戶上門,喺影片中就見到會發生槍戰。所以要同時強化保安,防止有人搞事以及對付警察。

 

 

 

另外玩家喺經營嘅過程唔係淨係顧住養雞煮雞製毒,仲要留意員工嘅精神狀態,萬一壓力過大就會入院導致人手更為短缺。玩家可以喺餐廳設置員工休息室、波枱、街機等娛樂設備,提高員工滿意度。擁有高滿意度嘅會提高生產力,如果滿意度過低就有機會喺工作中嘔吐並死亡。另外表面上嘅業務唔係定做炸雞店,可以做自助洗衣店、夜總會或者槍店都得。

 

《Definitely Not Fried Chicken》預計於今年推出,對應平台為 PC Steam。

五木

五木 動漫電玩宅,極愛金田一系列,擅長動作及策略遊戲

追蹤

更多文章