【遊戲新聞】原作招式霸氣重現 《鬼滅之刃火之神血風譚》聲優試玩首條實機對戰影片見街

改編自吾峠呼世晴超人氣漫畫《鬼滅之刃》嘅格鬥遊戲《鬼滅之刃 火之神血風譚》今年就會推出,日前喺「鬼滅之刃動畫 2 週年」活動就請咗炭治郎聲優花江夏樹以及我妻善逸聲優下野紘試玩,而且亦係第一次見街嘅實機試玩片段,睇落感覺幾唔錯。

 

 

《鬼滅之刃 火之神血風譚》由 CyberConnect2 製作,曾製作《火影忍者 終極風暴》、《七龍珠 Z 卡卡洛特》等作品。喺影片中見到本作系統極似《火影忍者 終極風暴》,主要玩法都係普攻連段(根據慣例應該有簡易連段)、霸體技(應該係儲力重擊)、投技、必殺技及超必殺技(奧義)。如果同以往作品一樣的話,相剋關係就應該係普攻連段 > 投技 > 霸體技 > 普攻連段,影片亦有出現投技 cut 霸體技嘅過程,相信本作系統都會跟返呢個套路。

 

 

每位玩家需選擇 2 位角色組成隊伍,試玩版入面我哋見到可選擇角色有炭治郎、我妻善逸、嘴平伊之助、禰豆子同埋富岡義勇五人。喺戰鬥中副隊友有兩個用途,可以輔助身份協助攻擊或者隨時切換角色(不過共用生命值)。另外當攻擊敵人時可累積畫面左下角嘅超必殺技(奧義)計量槽,有一格以上就可以使出畫面極之華麗嘅奧義,招式表現充滿霸氣絕對不輸原作。

 

 

《鬼滅之刃 火之神血風譚》預定 2021 年推出,對應平台為 Xbox Series X|S、Xbox One、PS5、PS4 及 PC。

滅盡殺手

重度魔物獵人中毒者,歷代遊玩時間破億分鐘!

追蹤

更多文章