【遊戲新聞】再次與好友互射對戰 《Splatoon 3》新玩法展示新舞台勁似香港

今日嘅「Nintendo Direct 2021.2.18」充滿驚喜,喺 Nintendo Switch 上最多人玩兼最好評嘅射擊對戰遊戲《Splatoon 2》續作正式發表, 新作自然有新地圖新武器,玩法亦似乎增加「空戰」元素,相信將會更為刺激好玩,極之令人期待。

 

 

《Splatoon 3》係一款多人射擊對戰遊戲,採用第三身視點。基本玩法係由玩家組成 4 vs 4 兩隊,使用武器所噴出嘅墨汁「搽」晒成個場地,最終以墨汁佔地較多一方勝。玩家可以喺自己所屬隊伍嘅墨汁中以「墨魚」型態快速隱身移動,而各種武器亦有射程、墨汁噴出量等差異,係一款表面上簡單易玩實際上充滿學問嘅作品。

 

 

今集舞台位於一片烈日高照嘅荒蕪沙漠「尚興地區」,而中心地帶就係以混雜街道為主嘅「蠻頹鎮」,亦即係今集玩家主要活動嘅範圍。喺官方圖片入面,我哋見到該地方滿佈密麻麻「唐樓」,街上嘅紅綠燈亦係香港格式。另外基本玩法雖然都係以「佔地對戰」為主,不過就加入由半空開始比賽嘅「魷魚生成」新動作,似乎之後大家要兼顧埋敵隊空中攻擊,同時亦加入新武器「弓」。

 

 

《Splatoon 3》預計於 2022 年發售,今次將會係系列首次對應中文化,對應平台為 Nintendo Switch。

 

五木

動漫電玩宅,極愛金田一系列,擅長動作及策略遊戲

追蹤

更多文章