【遊戲介紹】國際象棋混合解謎遊戲《Knight’s Retreat》新手老手同樣玩得過癮

Netflix 原創劇《后翼棄兵 (The Queen’s Gambit)》帶起左一陣國際象棋嘅熱潮,但係好多玩家連基本步法又未熟習,同電腦對奕冇乜新意之餘仲要輸到冇晒癮。不過唔使灰心,今次介紹呢隻非常有趣嘅解謎遊戲,絕對適合國際象棋初學者玩,玩完之後你一定有所進步。

 

 

由 Minimol Games 開發嘅《Knight’s Retreat》,將國際象棋同解謎遊戲混合而成,就算你完全唔識國際象棋,玩完呢隻 Game 之後,最少會熟習所有棋子嘅走法,對有興趣學習國際象棋嘅朋友有莫大幫助。遊戲玩法只要將隻橙色騎士 (Knight)依照國際象棋步法移動到橙色方格就可以成功過版。不過每當橙棋行過嘅格,都會被封鎖而無法再行。

 

 

白棋喺版圖中成為你嘅阻礙,而且會有不同種類棋子需要玩家移動,了解其他棋子嘅走向、步法從而令你嘅騎士可以到達目標位置。遊戲有 80 個關卡,頭幾關熟習個操控同各種棋類走法之後就開始有返咁上下難度,版圖謎題變化亦都非常充足,就算解謎或者國際象棋老手要玩晒所有關卡都唔係容易,非常抵玩兼耐玩。

 

 

《Knight’s Retreat》已經喺 PS4、Xbox One、NS 以及 Steam 平台上架,而且 Steam 都只係賣緊 $18,有興趣於國際象棋嘅朋友真係唔好錯過!

 

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章