【遊戲新聞】《Silent Hill》項目即將重啟?合作單位可能包括 Bloober Team

 

自從小島製作人離開 Konami、《P.T.》項目下架之後,一眾玩家都對於《Silent Hill(鬼魅山房|寂靜嶺)》系列嘅未來發展感到非常擔憂。近一年來,有關《Silent Hill》項目重啟嘅傳言此起彼落,而剛剛推出《The Medium》嘅波蘭工作室 Bloober Team,好有可能正與 Konami 合作,開發《Silent Hill》相關新遊戲。

Bloober Team CEO Piotr Babieno 早前接受外媒 GIBiz 訪問時提到:工作室喺開發《The Medium》嘅同時,其實亦製作緊另一隻遊戲;呢隻遊戲「係一個好出名嘅恐怖遊戲 IP,屬於業界一間知名遊戲公司」,截至現時為止,開發工作已接近一年,雖然目前仲未可以透露係邊間公司嘅作品,但係到消息公佈嘅時候,相信全球玩家都會哄動。

 

《The Medium》

 

Bloober Team 於 2021 年 1 月份推出嘅恐怖遊戲《The Medium》,其遊戲配樂由著名日本遊戲配樂作曲家「山岡晃」負責;山岡先生為《Silent Hill》系列負責音效及作曲而聞名,同時亦負責《Silent Hill 3》及《Silent Hill 4》的遊戲開發工作。

不過,Bloober Team 並非近來唯一與《Silent Hill》話題有所關聯嘅工作室。根據外媒 VGC 報導,Konami 同時亦與日本國內一家經驗豐富嘅工作室合作開發《Silent Hill》遊戲,並預計 2021 年夏天會公開遊戲嘅相關預告;另一邊廂,Konami 亦與恐怖遊戲系列《Dark Pictures(黑相集)》工作室 Supermassive 傾談合作當中。

 

 

《Silent Hill》系列始於 1999 年,第一集為 PlayStation 遊戲,由著名遊戲製作人外山圭一郎擔任開發(另一著名作品為《SIREN 死靈曲》系列)(「Silent Hill 之父」外山圭一郎自己旗下嘅遊戲工作室,早前亦都公開左全新恐怖遊戲作品嘅概念圖)。

《Silent Hill》其後一直亦推出續集,不過每一代的製作人及工作室都或會有所不同,遊戲系統亦不斷有所改變。系列亦有唔同嘅衍生作品,包括於 2006 年上映的同名電影、漫畫、手機遊戲等等。

 

 

Konami 近年於主機遊戲市場並未交出耀眼成績單,自家開發的遊戲包括《Metal Gear Survive》(2018 年)、「魂斗羅」遊戲《Contra: Rogue Corps》(2019 年)都未能獲得玩家好評;因此 Konami 有心重整營運策略,去年開始重新編整自家遊戲工作室嘅人手,同時相比自家開發,更傾向對外尋求其他遊戲工作室的合作,所以先會出現「同時與多家工作室傾談合作」嘅狀況。

是次《Silent Hill》重啟計劃,不排除包含 Remake|Remaster 以及推出全新續作嘅可能性,相信於 2021 年下半年會正式公佈更多相關資料。

 

神婆

神婆 正職為塔羅占卜師,唔神秘,無形象,為咗兩隻貓嘅生活努力奮鬥。日系遊戲及 RPG 專攻,重度聲優控。

追蹤

Facebook 更多文章