【遊戲介紹】台灣高質獨立製作 《最後指令》貪食蛇溝彈幕音樂好聽又好玩

貪食蛇大家都知道係咩啦,如果溝埋彈幕的話又會變成點?由台灣獨立開發者 Dinaya 製作嘅《最後指令》就將兩種元素溝埋,變成一款非常有趣嘅作品,早前出咗體驗版免費下載中,並於嘖嘖展開眾籌。

 

 

《最後指令》由 Dinaya 獨力開發,係一款結合貪食蛇與彈幕元素嘅動作遊戲。故事講述喺遙遠嘅未來,人類因為未知疾病「紫黑病」導致人口急遽減少,面臨種族存亡。為咗延續文明,人類推動「永恆計畫」,將人類意識數位化永久保存,使人類免於生老病死,永遠活喺二維世界中。突然間有一日,叫做「PYTHON」嘅爬蟲程式因為不明原因甦醒,為咗尋找被創造出來嘅原因而踏上旅途。

不過喺體驗版一開頭都有寫明故事會同正式版內容有所分別,算係一個獨立故事。

 

 

遊戲基本玩法就同傳統嘅貪食蛇一樣,都係用上下左右控制方向,會 Keep 住移動。另外就有一個「衝刺」動作,可以穿過攻擊或者加速移動一段距離。喺每個關卡入面都要擊破敵人嘅核心,玩家要收集隨機出現嘅「資料」,然後再用「解析」攻擊敵人。每個階段核心都會有 100% 血,瀕死時更會出現護甲,玩家要收集滿 100% 「資料」進入強化狀態先可以擊破敵人。喺一般狀態下,玩家不論有幾多 % 「資料」都可以隨時進行「解析」,不過一但受到傷害「資料」會歸零,要幾時進行「解析」係遊戲嘅關鍵。

 

 

試玩版入面有兩隻 Boss 可以挑戰,前期尚算輕鬆,但一進入中盤 Boss 開始玩彈幕就發現難玩,要睇準時機使用「衝刺」(唔可以亂用,有 CD 時間),或者按 Space bar 進行低速移動避彈。又因為當玩家收集得越多資料,進行「解析」嘅速度就越快,而且「解析」時移動速度會變得極低,所以攻擊時機都要把握得好好,並唔係齋避彈就 OK,真係越玩越過癮。

 

 

遊戲畫面睇落去雖然好似頗單調,基本色調都係灰+紅,但實際遊玩時就發現係便利玩家嘅設計,因為喺呢隻遊戲入面灰色=安全;紅色=危險。用灰、紅兩種顏色去表達,就算喺彈幕中玩家亦都唔會睇得辛苦(我玩標準難度都要死三次先過到第一隻王)。加上背景音樂配合得非常出色,打 Boss 時勁有感覺,齋聽歌都覺得正。

 

 

《最後指令》預計於今年 6 月推出,對應平台為 PC,現時於嘖嘖進行集資(已超額達標十倍),並有試玩版提供免費下載。

五木

五木 動漫電玩宅,極愛金田一系列,擅長動作及策略遊戲

追蹤

更多文章