【遊戲感想】《The Outer Worlds》最後 DLC「艾瑞丹諾斯謀殺案」劇情有驚喜|惜後期多 Bug 影響遊玩體驗

 

《The Outer Worlds》最後一個 DLC《Murder On Eridanos》(天外世界:艾瑞丹諾斯謀殺案)已於 2021 年 3 月 18 日正式推出(報導)。《The Outer Worlds》出自 Obsidian 工作室,主線遊戲做得非常出色,頂承住「《Fallout》精神續作的名銜」,於遊戲裡面充滿住考驗玩家良心、以及動搖你立場的選項,呢一項特色一樣延續到 DLC 裡面。

 

 

玩家於今次呢個 DLC 中嘅身份係偵探,被要求搵出殺死女明星「神翠海倫(Halcyon Helen)的兇手。兇殺案發生於 DLC 新版圖 Eridanos 嘅 Grand Colonial Hotel,同一個地域上面,仲有「Rizzo’s Spectrum Vodka」嘅釀造廠。原本以為今次嘅任務真係搵線索查案,但係玩家好快就會發現,呢單兇案背後絕對有住更大嘅陰謀。

 

 

畢竟係《The Outer Worlds》,遊戲又點會淨係得查案問話咁單調,例如開始偵查之後,玩家會偶爾遇到一啲暴走嘅員工同保安、亦會發現呢個星球上面嘅人經常都係「佢一直望住你笑,笑到你心都寒埋」;同時,你需要偵查嘅幾個嫌疑人物,都對今次嘅兇案以及 Halcyon Helen 抱住微妙嘅態度以及動機。《Murder On Eridanos》嘅故事發展同結局情線都算出人意表,假如你 Enjoy 遊玩《The Outer Worlds》的話,非常鼓勵你繼續玩埋佢兩個 DLC。

 

 

不過,「Murder On Eridanos」有一個頗大的問題,係 Bug,甚至 Game Crush。我喺遊玩《The Outer Worlds》以及第一個 DLC「Peril on Gorgon」時幾乎從來無遇過呢個問題,所以於「Murder On Eridanos」裡面遇到第一次彈 Game 時,我一度以為係自己主機嘅問題,但係後來明顯發現,個 DLC 應該有 Bug 未 Fix 好……呢個狀況喺 DLC 中後期出現得比較嚴重。

例如我自己就遇過:去到任務地點時卻無法觸發任務、有 NPC 卡在桌子中間,而最嚴重的狀況出現在結局打 Boss 的段落,每當我想要手動 Save、或者進行任務主線必須的互動時都會彈 Game,簡單黎講,就係一打王就彈 Game!在 Reddit 上面也有大量外國玩家反映出現這樣的問題,所以我在擴寫這篇文章的時候,王是打了,但是一直沒能看到 DLC 最後的結局……

看來要等工作室推出 Patch 先可以解決呢個狀況了,不過呢堆 Bug 真係幾影響遊玩體驗,可惜。

 

 

當然,重申,DLC 是值得玩的,故事有趣,場景都做得幾有心思。不過,我認為「Peril on Gorgon」嘅戰鬥難度高啲,「Murder On Eridanos」的雜魚敵人與種類都不多,假如玩家如建議一樣有 30LV 以上去玩這個 DLC 的話,應該入到去都係開無雙嘅狀態(不過要打戰鬥嘅場面其實唔多,呢個 DLC 對話部份比較多)。

「Murder On Eridanos」已經係《The Outer Worlds》最後一個 DLC,對於我呢個 Fans 黎講,絕對非常唔捨得,早前有傳聞話《The Outer Worlds》都有推出第二集嘅打算,希望早日能夠聽到相關嘅消息!

 

 

《The Outer Worlds》於 2019 年 10 月 25 日初次推出,目前對應 Xbox Game Pass(唔包 DLC),同時對應機種 Xbox One|Series X|S、PS4|5|PC、Switch;兩個 DLC「Peril on Gorgon」及「Murder On Eridanos」已經上架。

 

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章