【遊戲介紹】多人不對稱求生遊戲要背叛同伴《First Class Trouble》對抗郵輪人工智能暴走的求生遊戲

 

丹麥獨立工作室 Invisible Walls 推出名為《First Class Trouble》嘅多人不對稱競技求生遊戲,目前正於 Steam 上進行早期體驗,遊戲預計於今年尾正式推出,初期對應 PC 平台,正式推出時會登錄到 Xbox Series X|S|One、PS4|5 以及 Switch。

 

 

《First Class Trouble》為一隻鬥智鬥力嘅多人遊戲,玩家飾演豪華宇宙遊輪頭等倉嘅住客,郵輪上面嘅中央人工智能「CAIN」因為失控而暴走,唔止喺船上放出毒氣,船上由「CAIN」控制嘅機械服務人員亦都搖身一變,成為追殺人類嘅殺人機器。

玩家作為 12 位倖存者之一,為咗生存落去,必須與其他玩家合作,努力搵到關閉「CAIN」嘅方法;不過,為咗生存落去,有時亦都需要背叛自己嘅隊友;加上,對人類抱有敵意嘅機械生命體,亦都混入倖存嘅乘客當中,佢地以殲滅其他乘客作為目標,令到求生行動更加困難。

 

 

遊戲需要玩家利用語音進行合作,亦都要小心防範隊友嘅可疑行動;遊戲裡面亦都充滿住各種可以害死隊友嘅方法,例如逼人入冷凍倉凍死佢、觸電死、或者將佢呃入隔離倉再將隊友排放去外太空等等,可以話係一隻惡意得黎幾搞鬼嘅求生遊戲。

 

 

同時,作為舞台嘅豪華宇宙遊輪上面有住各式場景,包括賭場、泳池、各種美侖美奐嘅設施,都係值得玩家多多探索嘅空間,話唔定會有作為意外驚喜嘅線索出現。

 

 

工作室表示會於日後不斷加入新嘅殺人要素,亦會在遊戲中加入「觀眾模式」方便希望進行直播嘅玩家。

 

 

《First Class Trouble》2021 年 4 月 9 日起於 Steam 上進行早期體驗,遊戲預計於同年尾正式推出,初期對應 PC 平台,正式推出時會登錄到 Xbox Series X|S|One、PS4|5 以及 Switch。

 

 

神婆

神婆 為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章