【遊戲介紹】泡製最完美咖啡 《Espresso Tycoon》模擬經營遊戲建立咖啡王國

講到咖啡王國 Starfuck 一定名列前茅,但係有無覺得某種咖啡可以做得更完美,又或者有啲新諗頭可以嘗試呢?黎緊有隻叫做《Espresso Tycoon》嘅遊戲就係要經營一間咖啡店,可以自由配製咖啡嘅成份,又幾過癮!

 

 

《Espresso Tycoon》由 DreamWay Games 開發,係一款模擬經營遊戲。遊戲主要玩法都係同大家熟悉嘅模擬經營類差唔多,都係要選擇店舖位置、裝修、聘請員工及管理、設計售賣嘅貨品等等,店舖開張後仲要計住夠唔夠資金,應該要開分店定係削減開支。當然一直賺錢的話自然可以擴展你嘅咖啡業務,最後甚至可以建立咖啡王國,就好似 Starfuck 咁。

 


 

不過玩得呢隻 Game 最精彩果 Part 都係整自家咖啡呢 Part,由咖啡 Base 嘅組成,到落咩奶、落多過一種奶、加唔加水等等全部有得自由發揮,而且仲有得微調每種材料嘅分量。搞掂杯咖啡之後,仲可以選擇埋用邊種拉花,各種組合又會受到唔同嘅顧客喜愛,可以話係千變萬化。如果調配出色的話,更有機會得到 KOL 嘅推薦,對推廣咖啡生意有直接幫助。

 

 

《Espresso Tycoon》預計 2022 年上市,不過好快就會有 Demo 體驗版供玩家下載,有興趣嘅朋友可以先將佢加入 Wishlist,對應平台為 PC Steam。

五木

五木 動漫電玩宅,極愛金田一系列,擅長動作及策略遊戲

追蹤

更多文章