【遊戲新聞】過癮小品免費下載 《Good Job!》期間限定免費二人搞笑合作同遊

上年年頭喺 Nintendo Switch 上面出咗隻搞笑益智遊戲《Good Job!》,遊戲可以二人同遊,加上各種有趣有創意嘅玩法獲得玩家一致讚賞。今日任天堂就宣佈呢隻過癮小品會進行會員期間限定免費下載,之前無買到嘅朋友記得趁今次機會玩咗先算!

 

 

《Good Job!》由 Paladin Studios 開發,係一款益智動作遊戲,支援二人單機同遊。遊戲中玩家扮演一間大型公司老闆嘅兒子,接受各種工作並以非尋常方式完成任務。例如會議室需接用投影機,一般正常做法係拆部機再搬入去,不過喺呢隻遊戲入面就係用電線當橡筋,再彈射部機去轟爆幅牆,基本上呢隻遊戲係用任何方法玩都得,只要達成目標就係 Good Job!

 

雖然係小品遊戲,但係後期關卡都幾用腦

 

今次任天堂期間限定免費下載參加方法非常簡單,只要閣下有 Nintendo Switch Online 資格(有玩動森同芒亨都實有),再喺 Nintendo eShop 選擇「Nintendo Switch Online」後點按「試玩同樂會」,再去《Good Job!》上方試玩同樂會開始下載遊戲,就可以喺 2021 年 4 月 19 日 12:00 ~ 4 月 25 日 17:59 間暢遊本作。

五木

五木 動漫電玩宅,極愛金田一系列,擅長動作及策略遊戲

追蹤

更多文章