【遊戲介紹】末日世界盡顯人性 《Ashwalkers》於瘋狂與絕望中掙扎求存

如果你係世界末日後僅存嘅人類,你覺得自己會唔會頂得順一個無規則、無公理嘅世界?曾經係《Life is Strange》研發團隊 Dontnod 聯合創始人 Hervé Bonin,創立新工作室 Nameless XIII 並製作出呢隻末日題材新作《Ashwalkers》,體驗精彩劇情面對自己人性中嘅 Dark Side。

 

 

《Ashwalkers》係一款末日生存冒險遊戲,整隻遊戲採用黑白美術風格。遊戲故事發生喺一次不明地質災難 200 年後,地球已經變成一個充斥嚴苛天氣、灰燼風暴、灰色暴風雪以及酸雨等災害嘅荒蕪世界。為咗生存,於是四人同行上路尋找新嘅安身之所。

 

 

遊戲主打劇情敘事,節奏雖慢但就主力喺人性上刻畫。玩家喺冒險中負責分配食物、藥物、裝備及任務,要確保隊員性命之餘仲要顧及佢地嘅心理,要保護佢地唔好因為天氣、困境等挫折而陷入瘋狂與絕望,同時玩家可以深入了解小隊成員間私下嘅互動及關係,感受佢地所受到嘅精神壓力。

根據官方嘅資料,玩家會喺旅途上面臨一個又一個嘅人性與道德嘅選擇,喺末世中感受人情冷暖。遊戲採用多結局玩法,每一輪大約 2 小時就可以通關,每次通關後都會發現新嘅劇情路線,總共有 34 種結局供玩家探索。

 

 

《Ashwalkers》已於 4 月 15 日推出,目前大多數玩家都給予好評。遊戲對應平台為 PC Steam、GOG.com 及 Epic Games Store。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章