【遊戲介紹】克蘇魯主題恐怖遊戲《Cthulhu: Books of Ancients》第一視點偵探心靈系解謎

 

耐唔耐就會有克蘇魯相關主題遊戲推出,波蘭遊戲工作室 SimFabric 目前就正在開發《Cthulhu: Books of Ancients》,暫時對應平台為 Steam PC,為一隻第一視點單人恐怖遊戲,推出日期未定。

 

 

《Cthulhu: Books of Ancients》其實早於 2018 年已經公佈,不過由於遊戲包含動畫以及多種遊玩元素,因此開發需時。遊戲以 H.P. Lovecraft 筆下嘅《Call of Cthulhu》作為藍本,玩家於遊戲中飾演私家偵探,你接到任務,要追尋六個失蹤嘅細路。但係於查證過程當中,某日,你嘅門口出現一張神祕筆記,令你開始明白佢地嘅失蹤似乎唔係有拐子佬,而係與另外一啲力量有所關聯。

 

 

熟悉克蘇魯作品嘅玩家,應該就對 University of Miskatonic(米斯卡塔尼克大學)唔會感到陌生;呢間大學為克蘇魯原著故事入面嘅主要場景,雖然係虛構出黎嘅大學,但係人氣之高令佢甚至有自己嘅維基專頁。由於遊戲主角認為大學圖書館裡面,會有解開呢一切謎題嘅線索,所以呢間大學亦會係玩家於遊戲中會面對嘅重要場景之一。

 

 

目前官方放出嘅遊玩畫面及資訊唔算多,例如係會唔會有克蘇魯遊戲常見嘅 SAN 值設定、會唔會有戰鬥部份等等,都仲係未知之數,只知佢係一隻需要玩家用腦嘅解謎遊戲。但係以非主流大廠開發嘅遊戲黎講,《Cthulhu: Books of Ancients》目前於畫面、故事等方面都有唔錯表現,因此引起不少玩家關注。以下為官方 Trailer,有新消息會再為大家報導。

 

 

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章